चैत्य जिर्णोद्वार क्वचाःगु लसताय् सुभाय् देछा

ख्वप – मैत्रेय युवा संघ व चैत्य सम्पदा संरक्षण समितिया मंकाः ग्वसालय् थनया तालाक्वः त्वाःया दम्फ्वःय् च्वंगु ऐतिहसिक चैत्य जिर्णोद्वारया ज्या क्वचाःगु लसताय् वंगु शनिवाः सुभाय् देछायेगु ज्याझ्वः जुल । मुनि विहारया श्रद्धेय भिक्षु क्षान्तिशोभन पाखें पंचशील बियाबिज्यासे दीप प्रज्वलन यानाः न्ह्याःगु ज्याझ्वलय् चैत्य जिर्णोद्वार समितिया संयोजक तीर्थराज वज्राचार्यं लसकुस यासें स्थानीय सरकारं सम्पदा संरक्षणया ज्याय् म्हितूगु भूमिकायात कयाः च्वछायादिसें चैत्य व बौद्ध सम्पदा संरक्षणया ज्याय् ख्वप नगरपालिकां चिउताः तयेमाःगु खँ कनादिल । लिसें वय्कलं समितिपाखें वइगु दिनय् नं थुकथंया ज्यायात निरन्तरता बिया वनेगु प्रतिवद्धता प्वंकादिल ।

श्री महामञ्जुश्री गुरु गुथि संस्थाया छ्याञ्जे पद्मसुन्दर शाक्यया सभापतित्वय् न्ह्याःगु ज्याझ्वलय् मूपाहांकथं बौद्ध अनुसन्धानकर्तालिसें पाटन बहुमुखी क्याम्पसया बुद्ध धर्मसम्बन्धी व्याख्याता मय्जु डा. जुनु वासुकलां चैत्यया महत्व व ऐतिहासिकताया पक्षयात कयाः चर्चा यानादीगु खः । वय्कलं जिर्णोद्वार जूगु चैत्य लिच्छिवीकालीन जूगु व करिब द्वःछिदँ स्वयां नं पुलांगु खयेमाः धयादिल ।

नेपाल सरकारयाके कार्बन डेटि· यायेगु उपकरण मदुगुलिं अनुसन्धानकर्तातय्सं अनुमानया आधारय् धायेमाःगु विडम्बनाया खँ खः धयादिल । लिसें वय्कलं थुकथंया सम्पदाया नियमित रुपं सुचुकुचु यायेमाःगु खँय् नं बः बियादिल । चैत्य निर्माणया आय व्यय संचित बुद्धाचार्यं न्ह्यब्वयादीगु ज्याझ्वलय् श्रद्धेया भिक्षु क्षान्तिशोभनं चैत्यया महत्वयात कयाः धर्मोपदेश बियाबिज्याःगु खः । उगु चैत्य थगुने कात्तिकं शुरु जुयाः वंगु कात्तिकं क्वचाःगु खः ।

चैत्य जिर्णोद्वारया निंतिं मैत्रेय युवा संघया संस्थापक नायः तीर्थराज वज्राचार्यया संयोजकत्वय् पद्मसुन्दर शाक्य, संचित बुद्धाचार्य, तेजरत्न वज्राचार्य, प्रेमशोभा वज्राचार्य, प्रविना शाक्य दुजः दुगु समिति गठन याःगु खः ।