सहिद गंगालाल श्रेष्ठ व दशरथ चन्द्रप्रति श्रद्धाञ्जली देछा

येँ- सहिद सप्ताहया खुन्हुया दिं सहिद गंगालाल श्रेष्ठ व सहिद दशरथ चन्दया झ्वाताय् स्वां देछाःगु दु । सप्ताहव्यापी ज्याझ्वःया झ्वलय् गंगालाल श्रेष्ठ व दशरथ चन्दं सहादत प्राप्त याःगु थनया शोभाभगवती पलिस्था यानातःगु वय्कःपिनिगु झ्वाताय् स्वां देछायेगु ज्या जूगु खः ।

सहिद दिवस मूल समारोह समितिया संयोजक लिसें येँ महानगरपालिका प्रमुख विद्यासुन्दर शाक्य, उपप्रमुख हरिप्रभा
खड्गी श्रेष्ठ, प्रमुख प्रशासकीय अधिकृत लोकनाथ पौड्याल, येँ महानगया प्रवक्तालिसें १५ वडाअध्यक्ष ईश्वरमान डंगोललिसें समितिया पदाधिकारीतय्सं वय्कःपिनिगु झ्वाताय् स्वां देछानादीगु खः ।

सहिद श्रेष्ठ व चन्दं सहादत प्राप्त याःगु थासय् न्हापा शिला स्तम्भ जक तयातःगु खःसा लिपा अर्धकदया झ्वाता तःगु खः । विद्यासुन्दर शाक्यया नेतृत्वय् येँ महानगरय् निर्वाचित जनप्रतिनिधि वयेधुंकाः वय्कःपिनिगु पूर्णकदया झ्वाता पलिस्था याःगु खः ।
तात्कालीन येँ नगर पंचायतं २०३६ माघ १५ गते शिला स्तम्भ शिलान्यास यानाः २०३७ माघ १७ गते उकिया उलेज्या याःगु खःसा २०५८ सालय् येँया चिकंमुगलय् च्वंम्ह प्रचण्डलाल श्रेष्ठं निम्हं सहिदया अर्धकदया झ्वाता दयेके बियाः थापना याःगु खः । अनंलि २०७६ सालय् येँ महानगरं सहिद गंगालाल श्रेष्ठ व सहिद दशरथ चन्दया पूर्णकदया झ्वाता पलिस्था याःगु खः ।

जहानिया राणा शासन विरुद्ध ज्या याःगु, जनतायात प्रजातन्त्रय् लगे जुइत भाषण याना जूगु थीथी द्वपं बियाः निम्हं सहिदयात १९९७ माघ १५ गते गोली कयेकाः मृत्युदण्ड बिउगु खः ।

येँ महानगरं प्यम्हं सहिदया सम्मानय् वय्कःपिंसं हे सहादत प्राप्त याःगु थासय् पलिस्था यानातःगु पूर्णकदया झ्वाता कलाकार महेश तुलाधरं दयेकादीगु खः । उकीमध्ये धर्मभक्तया झ्वाता निथाय् दु ।