महाकवि सिद्धिदासया नामय् ‘सिद्धि लुमन्ति क्वथा’

ख्वप- सिद्धिदास प्रतिष्ठान ख्वपया ग्वसालय् जूगु महाकवि सिद्धिदास महाजुया १५४ क्वःगु बुदिं हने ज्याझ्वलय् सिद्धि लुमंति क्वथा न्ह्याकेज्या जुल । ताः ई न्ह्यवंनिसें सिद्धिदासया लुमन्तिइ थीथी ज्याझ्वः याना वयाच्वंगु प्रतिष्ठानं थुगुसी न्हापांखुसी महाकविया थीथी पक्षयात दुथ्याकाः थुगु सिद्धि लुमन्ति क्वथा नीस्वंगु खः ।

सिद्धिदास प्रतिष्ठानय् नीस्वंगु थुगु सिद्धि लुमन्ति क्वथाया शुभारम्भ ज्याझ्वलय् कवि योगेन्द्र प्रधानं मदयावंपिंत लुमंकेगु ज्या दुपिंसं यायेमाःगु खँ कुलादिसें यक्व समकालीन च्वमित स्वयां फरक ढंगं निरन्तर च्वयाच्वंम्ह कवि सिद्धिदास महाजु च्वछायेबहःम्ह नेपालभाषाया च्वमि खः धयादिल ।

रामशेखर लुमन्ति दबूया नायः गोविन्दमान श्रेष्ठं राणाकालय् नेपालभाषां च्वयेगु हाथ्यां जाःगु इलय् नं सिद्धिदासं मदिक्क च्वयादीगु साहसिक ज्या खः धयादिल । महाजु फाउण्डेशनया नायः ओमचरण अमात्यं चन्द्र शमशेर थेंज्याःम्ह क्रुर शासकया पालय् नेपालभाषां च्वयाः महाकवि सिद्धिदासं यानावंगु सराहनीय जूगु खँ कनादिल । सिद्धिदास प्रतिष्ठानया दुजः कवि त्रिरत्न शाक्यं नं न्ववानादीगु उगु ज्याझ्वलय् विराट नेपालभाषा साहित्य सम्मेलन गुथिया नाय महेन्द्रगोपाल कर्माचार्यं भिन्तुना बियादीगु खः । प्रतिष्ठानया अध्यक्ष नरेन्द्रभक्त हाडाया सभापतित्वय् जूगु ज्याझ्वलय् उज्ज्वल नेवालं लसकुस यानादीगु खः ।

महाकवि सिद्धिदास बुन्हिया लसताय् येँय् नं सिद्धिदास लुमंति समाजपाखें वय्कःया झ्वाता तयातःगु भोताहिति लागाया ‘सिद्धिदास चोक’ य् मत च्याकाः दिपावली यात । समाजपाखें उगु दुवाःयात आः सिद्धिदास चोक नां तयेगु प्रस्ताव नं न्ह्यःने हःगु दु ।