यँयाः स्वःवःपिं पाहांपिंत विदाई

येँ – थुगुसी यँयाः जात्रा निरीक्षण यायेत येँय् झाःपिं विदेशी पाहांपिंत म्हिगः विदाई यात । राष्ट्रिय सभागृहय् जूगु ज्याझ्वलय् विदेशी पाहांपिंत येँ मनपाया मेयर विद्यासुन्दर शाक्यं थीथी उपहार बिसें विदाई यानादीगु खः । ज्याझ्वलय् संस्कृति, पर्यटन व नागरिक उड्डयन मन्त्री योगेश भट्टराई मूपाहां कथं झाःगु खः ।

वय्कलं थ्व ज्याझ्वःपाखें नेपाल भ्रमण वर्षयात बांलाःगु लिच्वः लाकीगु बिचाः प्वंकादिल ।येँ मनपाया ब्वनाय् यँयाः पर्व स्वयेगु लागिं थुगुसी चीन, भारत, भूटान, जापान व अमेरिकाया प्यम्ह मेयर लिसें ४१ म्ह प्रतिनिधित येँय् वःगु खः । वय्कःपिं मध्ये प्यम्ह मेयरपिंत गद्दी बैठकय् हे तयाः कुमारी साःगु अवलोकन याकूगु खःसा मेपिंत महाद्यः–पार्वती देगः क्वय् तयाः जात्रा क्यनेगु ज्या जूगु खः ।

वय्कःपिंत कुमारी साली कुन्हु हे येँया पुलांगु वस्ती अवलोकन याकेगु ज्या जूगु खः । लिसें वय्कःपिंत म्हीग चन्द्रागिरी व स्वयम्भू चाःहीकूगु खःसा म्हिगः यल व ख्वप लाय्कू लागा निरीक्षण याकूगु खः । चन्द्रागिरीइ वय्कःपिंत सांस्कृतिक ज्याझ्वः नं क्यंगु खःसा मेमेगु लागाय् स्थानीय खलः पुचःतय्सं सिन्हः तिकाः व ख्यें सगं बियाःं लसकुस याःगु खः ।

सम्बन्धित बुखँ

LEAVE YOUR COMMENTS