अय्लाः मीगुलिं नियन्त्रण यायेगु तयारी

येँ –  सरकारं अय्लाः मीगुलिइ नियन्त्रण यायेगु तयारी यानाच्वंगु खँ सीदुगु दु । उकिया निंतिं गृह मन्त्रालयं ‘मदिरा उत्पादन तथा बिक्री वितरणको नियमन तथा हानिकारक सेवन नियन्त्रण सम्बन्धी कार्यकारी आदेश २०७५’ तयार यानाः स्वीकृतिया निंतिं मन्त्रिपरिषदय् छ्वःगु दु ।

मन्त्रि परिषदय् छ्वःगु उगु आदेशय् अय्लाःयात जनस्वास्थ्य, शान्ति सुरक्षा व अमनचयन कायम यायेगुलिइ नकारात्मक लिच्वः लाकीगु वस्तुया रुपय् व्याख्या यानातःगु दु । लिसें आदेशय् विश्व स्वास्थ्य संगठनं तकं अयलाः–थ्वँयात मृत्युया मू कारण माने यानातःगुलिं थुकिया नियमन यायेगु सरकारया कर्तव्य जुइगु धयातःगु दु ।

गाउँपालिकाया क्षेत्रय् छगू जक अय्लाः पसः तयेदइगु व्यवस्था यानातःगु दुसा नगरय् धाःसा छगू वडाय् निगू तक अय्लाः पसः तये दइगु व्यवस्था यानातःगु दु ।

उगु आदेश मन्त्रिपरिषदं पास जुल धाःसा अय्लाः उत्पादकतय्सं नं सूर्तिजन्य पदार्थय् थें थःपिनिगु बोतलय् चेतावनीमूलक सन्देश दुगु किपा तयेमालीगु जूगु दु । अथेहे गुगुं नं सार्वजनिक समारोह लिसें ज्याझ्वलय् अज्याःगु त्वनेगु पदार्थ त्वने दइमखु ।

आदेशय् गाउँपालिकाया क्षेत्रय् छगू जक अय्लाः पसः तयेदइगु व्यवस्था यानातःगु दुसा नगरय् धाःसा छगू वडाय् निगू तक अय्लाः पसः तये दइगु व्यवस्था यानातःगु दु । उकथं हे अय्लाः मीगु ई नं क्वःछिनातःगु दु । अय्लाः बहनी ५ बजे निसें १० बजे तक जक मी दइ । लिसें अय्लाः न्याःवइम्हेसिया व्यक्तिगत विवरण नं अनिवार्य रुपं कायेमाःगु व्यवस्था आदेशय् यानातःगु दु ।

थ्व आदेश मन्त्रिपरिषदं पारित जुल धाःसा अय्लाः वा वियरया मेगु उद्योग चायेकेगुलिइ नं प्रतिबन्ध जुइगु खँ धाःगु दु । अथेहे कार्यकारी आदेशया प्रतिकूल जुइगु थासय् दुगु उद्योगयात नं निश्चित ईया दुने चीकाः मेथाय् तये यंकेमाःगु व्यवस्था यायेत्यंगु दु ।

उकथं हे अय्लाः मीगु पसः धार्मिक स्थल न्ह्यःने दये मजिउगु, अस्पताल लिक्क दये मजिउगु, विद्यालय न्ह्यःने दये मजिउगु व विश्व सम्पदास्थलं ५ सय मिटर तापाक तयेमाःगु व्यवस्था यानातःगु दु ।

 

सम्बन्धित बुखँ

LEAVE YOUR COMMENTS