चाबहीया दिपय् हानं ल्वापु
स्थानीय नेवाःतय्सं प्रहरी पाः तयाः सी उइ माल
येँ – चाबहीया सी उइगु दिपय् म्हिगः नं सी उइगु खँयात कयाः स्थानीय जनता व दिपया जःखः च्वं वःपिं मनूतय् दथुइ विवाद जुल ।स्थानीय ६० दँ दुम्ह लक्ष्मी डंगोलया दाहसंस्कार यायेगु लागिं अन सिथं हःगु खनेवं अन जःखः छेँ दनाः च्वं वःपिं पिनेयापिं मनूतय्सं पनेगु कुतः याःगु खः ।
सी कुबिया वःपिंत हे पनाः उमिसं झण्डै सीम्ह हे लाका कायेगु तक कुतः याःगु खँ पीडित डंगोल परिवारं धाःगु दु । उमिसं पनेगु कुतः यायेवं सिथं वःपिं मनूतय्सं उपिंलिसे प्रतिकार याःगु खः । सिथं वःपिंसं उगु दिपय् परम्परागत रुपं थःपिंसं दाहसंस्कार याना वयाच्वनागु जूगुलिं थःपिनि थ्व अधिकार हनन् याये दइ मखु धकाः अन नाराबाजी समेत याःगु खः ।
ल्वापु तच्वया वनीगु सम्भावना खने दयेवं अनं सुरक्षाया लागिं स्वंगः भ्यान प्रहरी हे वये माःगु खः । अन्तिमय् प्रहरीया कडा पाः तयाः तिनि सी उइगु ज्या यायेमाःगु खः । उगु दिप लाःगु वडा नं. ७ या अध्यक्ष शुद्ध कुमार डंगोलं लाश हे लाका कायेगु थें ज्या जूगुलिं प्रहरी हे पाः तयाः सुरक्षा बीमाःगु खँ कनादिल ।
उगु थासय् चाबही लागाय् च्वनीपिं स्थानीय शाक्य व डंगोल समुदायया निगू अलग अलग हे दिप दु । तर अन दिपया नापसं हे छेँ दनाः च्वं वःपिं मनूतय्सं सी उइबलय् थःपिंत च्वने थाकुल धासें न्ह्याबलें सिथं हइपिंत पनेगु कुतः याना वयाच्वंगु दुसा थुकिं यानाः अन सिथं हल कि हे ल्वापु जुइगु जुयाच्वंगु दु ।
थ्व समस्या समाधान यायेत येँ महानगरपालिकाय् तकं खँ वःगु खःसां मनपां स्थानीय जनताया दाहसंस्कार यायेगु ज्यायात पने मजिउ धइगु बिचाः न्ह्यःने तयेवं पनेमाः धाइपिंसं वार्ता याः मवःगु खँ सीदुगु दु । समस्या गथे खः अथे हे जूगुलिं लिपा लिपा नं ल्वापु जुइ फइगु खँ वडा अध्यक्ष डंगोलं कनादीगु दु ।
‘आः अदालतं हे फैसला याके माली’
चाबहीया थ्व दिपय् सी उइगु ज्या जुल कि न्ह्याबलें नं विवाद जुइगु जुयाः वडा अध्यक्ष शुद्धकुमार डंगोल नं दिक्क जुयादीगु दु । थ्व समस्या समाधान यायेगु धकाः न्ह्याक्व कुतः याःसां जिम्मेवार निकायतय्सं ध्यान मबिउगु खँ वय्कलं कनादीगु दु । ‘नेपालभाषा टाइम्स’ लिसे खँ ल्हासें वय्कलं आः थुकिया समाधान सर्वोच्च अदालतया फैसलापाखें याके मालीगु बिचाः प्वंकादिल ।
दिपय् सी उइमाःपिं सम्बद्ध मनूतय्सं थःपिनि परम्परांनिसें चले जुया वयाच्वंगु दाहसंस्कारया ज्यायात पने दइ मखु धकाः सर्वोच्च अदालतय् रिट तयाः समाधानया उपाय माले माःगु बिचाः वय्कलं तयादिल । सी उइगु इलय् पं वइपिं जःखः च्वंपिं मनूतय्त नं थम्हं आः अदालतय् हे वनाः न्याय माः हुँ धकाः सुझाव बियाच्वनागु खँ नं वय्कलं कनादिल ।
LEAVE YOUR COMMENTS