यलय् आर्ट अफ लाखेया ब्वज्या

येँ(नेपालभाषा टाइम्स)-बेलायतय् च्वंपिं नेवाःतय् संस्था पासा पुचः गुथि, युकेया पुलांम्ह नायः संयुक्त श्रेष्ठं लाखेया बारे डिजिटल आर्टया ब्वज्या यानादीगु दु । लाखे संस्कृति पिब्वयेगु उद्देश्यं श्रेष्ठं ‘आर्ट अफ लाखे’ नांया डिजिटल आर्टया ब्वज्या यानादीगु खः ।

वाङ्मय शताब्दी पुरुष सत्यमोहन जोशी व बेलायतय् च्वँच्वनादीम्ह डा. लोचन मानन्धरं मंकाः कथं उगु ब्वज्याया उलेज्या यानादीगु खः । ब्वज्याया उलेज्या यानादिसें वाङ्मय शताब्दी पुरुष जोशी थम्हं मजिपाः लाखेया विषययात कयाः च्वयादीगु नाटकया बारे कुलादिसें लाखे संस्कृति बारे जानकारी बियादीगु खः ।

वल्र्ड नेवाः अर्गनाइजेसनया न्वकु तकं जुयादीम्ह बेलायतय् च्वनाच्वंम्ह भाषा ह्यमिलिसें कलाकार श्रेष्ठं थम्हं वंगु खुदँ न्ह्यवंनिसें लाखेया बारे जानकारी कयाः एनिमेटेड संकिपा दयेका वयाच्वनागु जानकारी बियादिसें उगु हे संकिपापाखें छुं छुं किपा नं दयेकागु व उकियात हे कयाः ब्वज्या यानागु जानकारी बियादिल ।
थ्व स्वयां न्ह्यः वय्कलं नेपाल संवत्या प्रवर्तक शंखधर साख्वाःया बारे नं एनिमेटडेड संकिपा दयेकादीधुंकूगु दु । वय्कलं ‘लिजेन्द अफ शंखधर साख्वाः’ या नामं शंखधरया बारे न्हापांगु एनिमेटेड संकिपा दयेकादीगु खः ।

थनया चाकुपाट बालकुमारी मार्गय् च्वंगु क्लासिक ग्यालरीइ जुयाच्वंगु ब्वज्याय् कलाकार श्रेष्ठं तयार यानादीगु २० पाः डिजिटल आर्टया ब्वज्या जुयाच्वंगु दु । वइगु शुक्रवाः तक न्ह्याइगु ब्वज्याय् लाखेनापं नेवाः संस्कृतिनाप स्वापू दुगु थीथी डिजिटल किपा नं तयातःगु दु ।

सम्बन्धित बुखँ

LEAVE YOUR COMMENTS