ने. सं. ११४४ ञलाथ्व नवमी -

धरहराय् काठमाडौं मलं कयातःगु पसः नं थुनीगु

येँ – धरहरा लागाय् दयेका तःगु पसःत थुनेधुंकाः आः काठमाडौं मलं धरहराया पूर्वपाखें तयातःगु पसः कवःत नं थुनीगु जूगु दु । उगु पसः कवःया बाः नं काठमाडौं मलं हे कायेगु याना वयाच्वंगु खः । उगु लागाय् न्हापा दनातःगु मेगु फुक्कं पसः कवःत धाःसा पूवंक थुने सिधयेधुंकूगु दु ।

येँ मनपा २२ वडाया अध्यक्ष चिनिकाजी महर्जनं आः धरहरा लागाय् छुं हे कथंया संरचना मतयेगु खँ ‘नेपालभाषा टाइम्स’ यात कनादिल । ऐतिहासिक व सांस्कृतिक लागायात व्यापारिक प्रयोजनया निंतिं छ्लेगु उचित मजू धासें काठमाडौं मलं दयेकातःगु संरचना नं थुनेत सहलह जुयाच्वंगु खँ वय्कलं कनादिल ।

मेखे मनपाया छम्ह अधिकृतं कनादी कथं उगु संरचना थुनेत काठमाडौं मलयात थौंकन्हय्पाखे हे सुचं बीगु तयारी जुयाच्वंगु दु । काठमाडौं मलं कयातःगु उगु पसःया छम्ह व्यापारीं पसः थुंसां थःपिंत खास छुं लिच्वः मलाइगु तर पसः थुने निन्हु न्ह्यः सुचं बिल धाःसा थःपिंसं हे पसः खाली याना बीगु खँ ‘नेपालभाषा टाइम्स’ यात कनादिल ।

उम्ह व्यापारीं धयादिल, ‘ऐतिहासिक व सांस्कृतिक थाय्या संरक्षण जुइमाः । थुकी छगू पुचलं ध्यबा जक कमे यायेगु स्वयाच्वंगु पाय्छि मजू । धरहरा लागा संरक्षण यायेगु ज्यां जिपिं नं खुशी हे जुयागु दु ।’ उम्ह पसल्यां कनादीकथं धरहरा लागाय् पसः थुनेगु थ्व ज्यां गुलिखे व्यापारीत धाःसा पीडित जूगु दु । वय्कलं कनादी कथं छखे पसः त्वःतेमाःगु समस्या व मेखे अग्रिम पुलातयागु बाः आः छु यायेगु धइगु समस्या उमित जुयाच्वंगु दु ।

धरहरा ठेक्का कयातःम्ह साइड वाकर्सं वंगु पुस महिनांनिसें दछिया बाः अग्रिम कायेधुंकूगु दुसा आः उगु ध्यबा गुकथं लित कायेगु धइगु समस्या अन पसः दुपिं व्यापारीतय्त जुयाच्वंगु दु ।