मानन्धर संघया ज्यासना पुचःयात हनेज्या

येँ (नेपालभाषा टाइम्स) – केन्द्रीय मानन्धर संघया न्हू निर्वाचित ज्यासना पुचःयात भिंतुना नापं हनेगु ज्या जुल । वंगु शनिवाः थनया दैसाः त्वालय् छगू विशेष ज्याझ्वःया दथुइ दैसाः त्वाः सनाःगू खलःपाखें संघया न्हूगु ज्यासना पुचःयात हनेज्या याःगु खः । सनाःगू खलःया कजि मणिकराज मानन्धरया सभापतित्वय् जूगु हना ज्याझ्वलय् तलेजु भवानीया मू पुजारी उद्धव कर्माचार्य विशेष पाहांकथं झायादीगु खः ।

नेवाः परम्पराकथं ख्यें सगं व हनापौ बियाः हनेज्या जूगु उगु ज्याझ्वलय् दैसाःत्वाः सनाःगू खलःया सचिव नापं केन्द्रीय मानन्धर संघया नवनिर्वाचित उपसभापति सन्देश मानन्धरयात दैसाः त्वाःया साःछेँय् दयेकेगु व ताःईतक दिनाच्वंगु बाजं खलःयात पुनःसंचालन यायेगु ज्याय् विशेष योगदान यानादीगुलिं विशेष सम्मान यासे द्वहलपा नं देछाःगु खः ।

ज्याझ्वलय् सनाःगू खलःया कजिलिसें ज्याझ्वःया सभापति मणिकराज मानन्धर, मानन्धर संघया निवर्तमान उपसभापति बद्रीनारायण मानन्धर, बागमति प्रदेशया निर्वतमान सांसदलिसें पुलांम्ह मन्त्री वसन्त मानन्धर, संघया नवनिर्वाचित उपसभापति सन्देश मानन्धर, सचिव केके मानन्धरपिंसं मानन्धर संघ व मानन्धर समुदाययात कयाः थःपिनि नुगः खँ तयादीगु खः ।

अथे हे फम्पि साय्‌मि गुथिं नं संघया न्हू निर्वाचित ज्यासा पुचःयात हनेज्या याःगु दु । गुथिया नायः बुद्धनारायण मानन्धरया सभापतित्वय् संघया न्हू निर्वाचित पदाधिकारीपिंत हनेज्या याःगु खः ।

गुथिया थाकुलि बुद्धनारायण मानन्धरं ख्यें सगं व हनापौ लःल्हासे हनेज्या याःगु ज्याझ्वलय् विशेष पाहां दक्षिणकाली नगरपालिका वडा नं. ६या वडाध्यक्ष शैलेसमान मानन्धर, गुथिया नायः बुद्धनारायण मानन्धर, संघया सचिव केके मानन्धरपिंसं माननधर संघया इतिहास लिसे थीथी पक्षयात कयाः नुगः खँ तयादीगु खः ।