मोतिलानि सिरपाः लःल्हात

येँ(नेपालभाषा टाइम्स)- एसइइनिसें एमए तगिमय् तक नेपालभाषा विषयय् दकलय् अप्वः ल्याः हयाः छक्वलं उत्तीर्ण जूपिं विद्यार्थीतय्त लःल्हाना वयाच्वंगु मोतिलानि सिरपाः लःल्हाःगु दु । मोतिलानि सिरपाः समितिया ग्वसालय् वंगु शनिवाः थनया चेम्बर भवनय् जूगु ज्याझ्वलय् उगु सिरपाः लःल्हाःगु खः ।

समितिया नायः प्रा. पे्रमशान्ति तुलाधरया सभापतित्वय् मूपाहांकथं झायादीम्ह नेपालभाषा केन्द्रीय विभागया प्रमुख डा. राजनलाल जोशीं उगु सिरपाः लःल्हानादीगु खः ।

कोरोना भाइरस (कोभिड–१९)या संक्रमणया कारणं वंगु निदँ न्ह्यःनिसें दिनाच्वंगु सिरपाः थुगुसी छक्वलं लःल्हाःगु खः । नेपाल संवत् ११३९ य् एसइइइ दकलय् अप्वः ल्याः हयादीम्ह जगतसुन्दर ब्वनेकुथिया सुमिता राजभण्डारी, बीए तगिमय् अप्वः ल्याः हयादीम्ह पाटन संयुक्त क्याम्पसया निसा प्रधान व एम तगिमय् अप्वः ल्याः हयाः उत्तीर्ण जुयादीम्ह नेपालभाषा केन्द्रीय विभागया कविन श्रेष्ठयात उगु सिरपाः लःल्हाःगु खः ।

अथे हे ने.सं. ११४० दँया निंतिं एसइइइ सदीक्षा महर्जन (जगतसुन्दर ब्वनेकुथि), बीएय् प्रमिला चित्रकार (पाटन संयुक्त क्याम्पस) व एमएय् प्रजित शाक्य (नेपालभाषा केन्द्रीय विभाग)यात सिरपाः लःल्हाःगु खः ।

ज्याझ्वलय् एसइइइ हप्वः ल्याः हयादीपिंत खुद्वः, बीएय् अप्वः ल्याः हयादीपिंत च्याद्वः व एमए तगिमय् अप्वः ल्याः हयादीपिंत झिद्वः तका दांलिसें हनापौ देछाःगु खः ।

थुगु सिरपाः मांभाय्या शिक्षापे्रमी मोतिलानि ताम्राकारं नीस्वनादीगु खःसा थुसुसी झिंगुक्वःखुसी थ्व सिरपाः लःल्हाःगु खः । ज्याझ्वलय् दाता मोतिलानिया काय सुवर्णरत्न ताम्राकारं सिरपाःया निंतिं स्वनातःगु कोषय् निगू लख तका व म्ह्याय्पिं नारायणदेवी तुलाधर व ज्ञानी सरोज तुलाधरं म्हतिं न्यय्द्वः न्यय्द्वः तक दां ग्वाहालि यानादीगु खः ।