असोज ३ गते हाकुगु न्हि

जनजाति, मधेसी, पहिचान पक्षधरतय्सं संविधान दिवस माने मयाइगु

येँ – सरकारं वइगु असोज ३ गते संविधान दिवस तःजिक न्यायेकेगु धकाः धयाच्वंसां आदिवासी जनजाति, मधेशी, मुस्मां व पहिचान पक्षधर दलतय्सं धाःसा उगु न्हियात ‘हाकुगु न्हि’या रुपय् हनीगु जूगु दु । नेपाल आदिवासी जनजाति महासंघया अध्यक्ष जगत बरामं विभेदकारी संविधान संशोधन यानाः उत्पीडित जनताया अधिकार स्थापित मयाः तले महासंघं असोज ३ गतेयात हाकूगु न्हिं कथं हनेगु खँ धयादीगु दु ।

वंगु बुधवाः छगू पत्रकार सम्मेलन यानाः बरामं उगु खँ धयादीगु खः । वय्कलं धयादिल, ‘असोज ३ यात आदिवासी जनजाति, मधेशी, दलित, मुस्मां, मिसा अल्पसंख्यकयात धोका, षडयन्त्र, जालसाझी व विभेद याःगु रुपय् कयागु दु । अथे जुयाः असोज ३ यात हाकुगु न्हिं कथं हनेत्यनागु खः ।’

अथेहे लोकसेवा आयोगं स्थानीय तहया कर्मचारी भर्ना सम्बन्धी विज्ञापन समावेशी व समानुपातिक कथं मयाःगु धासें आदिवासी जनजाति महासंघया नेतृत्वय् आन्दोलन जुया वयाच्वंगु वयाच्वंगु दु । पत्रकार सम्मेलनया झ्वलय् लोकसेवाया विज्ञापन विरुद्ध नं थीथी चरणया आन्दोलन घोषणा याःगु खः ।

आन्दोलनया ज्याझ्वः कथं वइगु भदौ ३० गते तक देय्न्यंकं पं्रचार प्रसार, अपील, गोष्ठी याइगु खँ दु । अथे हे असोज १ गते पहिचानसहित संघीयता सम्बन्धी प्लेकार्ड ब्यानर जुलुस प्रदर्शन यायेगु व असोज ३ गते बहनी देय्न्यंकं ७ बजे निसें ७ः३० ता ई कत ब्ल्याक आउट याइगु जूगु दु । पत्रकार सम्मेलनय् जारी याःगु विज्ञप्तिइ महासंघया अध्यक्ष बराम लिसें थीथी जातीय संस्थाया प्रतिनिधिपिंसं हस्ताक्षर यानातःगु दु ।

सरकारया तःजिगु तयारी
आदिवासी जनजातिं असोज ३ गतेयात हाकूगु न्हि हनेगु तयारी यानाच्वंगु दुसा सरकारं धाःसा उगु न्हियात संविधान दिवस कथं थीथी ज्याझ्वः यानाः हनेत देय्न्यंकंया सरकारी ज्याकूयात निर्देशन बिउगु दु । उगु न्हिकुन्हु फुक्कं सरकारी ज्याकुथि दीपावली यायेगु, देय्न्यंकं जनताया छेँय् नेपाःया ध्वाँय् ब्वयेकेगु, उकुन्ह छन्हु फुक्कं सरकारी ज्याकुथि वनीपिं सरकारी कर्मचारीं देय्या ध्वाँय्या लोगो दुगु टिसर्ट पुनेमाःगु धकाः निर्देशन बियातःगु दु ।

सरकारं संविधान दिवसकुन्हु पुनेगु निंतिं टिसर्टया डिजाइन तकं पितबी धुंकूगु दु ।संविधान दिवसया न्हि कुन्हु जुइगु थीथी ज्याझ्वलय् अनिवार्य रुपं राष्ट्रिय गान हायेकेमाःगु निर्देशन नं बियातःगु दु । लिसें सिनेमा हल, भजनकीर्तन याइगु थासय् नं राष्ट्रिय गान हालाः जक थःपिनिगु ज्याझ्वः शुरु यायेत निर्देशन बियातःगु दु । तर सरकारया निर्देशन गुलिखे थासय् धाःसा विवादास्पद जुयाच्वंगु दु ।