संविधान संशोधन अस्वीकार

येँ -राष्ट्रिय सभाया चुनावया सन्दर्भय् हानं पिहां वःगु संविधान संशोधनया मुद्दायात वाम गठबन्धनं अस्वीकार याःसां मधेसवादी दलतय्सं भविष्यय् थ्वहे मुद्दायात कयाः संघर्ष याये फुगु संकेत धाःसा बिउगु दु ।

२ नम्बर प्रदेशय् निगू मधेसवादी दलत संसफो व राजपालिसे तालमेल याना वनेगु धकाः एमालें याःगु संविधान संशोधनया मुद्दाय् वयाः असफल जूगु खः । संसफोया वार्ताकारतय्सं आः संविधान संशोधन यानाः राज्य पुनर्संरचना आयोगं तयार याःगु प्रतिवेदनयात लागू याकेगु प्रस्ताव तःगु खःसा एमालें न्हूगु संविधान जारी जुइधुंकूगु सन्दर्भय् आयोगया प्रतिवेदन औचित्यहिन जुइधुंकूगु तर्क न्ह्यब्वःगु खः ।

सूत्रया कथं संविधान संशोधनया मुद्दायात एमालें त्याग याःसां माओवादीं धाःसा एमाले सहमत जूसा थःपिं नं तुरुन्त हे तयार जुइगु सन्देश ससफोयात छ्वयाच्वंगु दु । थःपिं न्हापांनिसें हे संविधान संशोधनया पक्षय् दुगु जुयाः एमालेयात माने याये फत धाःसा थःपिंसं स्वतः हे उगु मुद्दायात समर्थन यायेगु खँ नं माओवादीं धयाच्वंगु दु ।

संसफोयात थःगु पक्षय् हयेगु लागिं एमालें राष्ट्रिय सभा चुनावय् २ नम्बर प्रदेशं थप छगू सिट संसफोयात त्वःता बीगु प्रस्ताव न्ह्यःने तःगु खः । तर संविधान संशोधन थेंज्याःगु एजेण्डायात त्वःताः छगू सिट काये मखु धकाः संसफों उगु प्रस्तावयात अस्वीकार याना छ्वःगु खः ।
एमालेया प्रस्ताव स्वीकार याःगु जूसा संसफोयात राष्ट्रिय सभाय् स्वंगू सिट दइगु व कांग्रेस शुन्य जुइगु खः । तर एमालेया प्रस्तावयात अस्वीकार याःगुलिं २ नम्बरय् संसफो निम्ह जक त्याइगु जूगु दुसा कांग्रेसयात नं निगू सिट दइगु जूगु दु ।

आः थ्व प्रदेशं एमालें नं निगू सिट त्याकीगु जूगु दुसा राजपां नं निगू हे सिट त्याकीगु जूगु दु ।

सम्बन्धित बुखँ

LEAVE YOUR COMMENTS