कपिलवस्तुइ न्यायेकल महाभिनिष्क्रमण दिवस

येँ- दँय्दसं असार पुन्हि (गुरु पुन्हि) कुन्हु थें म्हीग नं कपिलवस्तुया तिलौराकोटय् सिद्धार्थ गौतमं गृहत्याग याःगु न्हियात लुमंकाः महाभिनिष्क्रमण दिवस न्यायेकल । थौं स्वयां अथे हे २६०० दँ न्ह्यः असार पुन्हिया हे चान्हय् सिद्धार्थ गौतमं दरवार त्याग यानाः जंगल प्रवेश याःगु अवस्थायात लुमंकाः कपिलवस्तुइ चान्हय् १२ बजे हे उगु दिवस न्यायेकूगु खः ।

राजकुमार सिद्धार्थं दरवार त्याग याःगु ईयागु हे दृश्य पिलुइ कथं चान्हय् छम्ह ल्याय्म्हं समाः याना तःम्ह कन्थक सल गयाः दरवार त्वःताः पिहां वंगु लु क्यंगु खः । उगु इलय् राजकुमार सिद्धार्थ कपिलवस्तु दरवारया पूर्वया लुखां पिहां वंगु खः । उकुन्हु नं दरवारया पूर्वी लुखां हे सिद्धार्थ पिहां वंगु आकर्षक लु क्यंगु खः । तिलौराकोटय् पर्यटन विकास यायेगु ताः तयाः बुद्धिष्ट सर्किट डट कम व कपिलवस्तु टुरिजम्या ग्वसालय् उगु दिवस हनेगु ज्या जूगु खः ।