सापारु सांस्कृतिक ब्वज्याय् उत्कृष्ट जूपिंत सिरपाः लःल्हात

ख्वप – वंगु गुंपुन्हिया लसताय् ख्वपय् छवाःयंकं जूगु सापारु सांस्कृतिक ब्वज्याय् उत्कृष्ट जूपिंत सिरपाः लःल्हाःगु दु । नेपाल मजदुर किसान पार्टीया नायः नारायणमान बिजुक्छेँ रोहितं वंगु आइतवाः ख्पव लाय्कुलिइ जूगु ज्याझ्वलय् सिरपाः लःल्हानादीगु खः ।

विश्व नगरतय्गु ऐक्यवद्धता दिवसया लसताय् ख्वप लाय्कुलिइ जूगु ज्याझ्वलय् गुंपुन्हिया लसताय् छवाःयंकं ख्वपय् पिहां वःगु सांस्कृतिक झाँकी ब्वज्याय् उत्कृष्ट जूपिंत सिरपाः लःल्हाःगु खः ।

ज्याझ्वलय् नवासें नेमकिपाया नायः बिजुक्छें अस्यः पह वःगु व छेँजःपिं नाप च्वना स्वयेबह तकं मजूगु साहित्य कला न्ह्यब्वइगु ज्यापाखें साहित्यकार व कलाकारत न्ह्याबलें सतर्क जुयाच्वनेमाः धयादिल । लिसें वय्कलं वइगु दिनय् अझ अप्वः जनपक्षीय व प्रगतिशील साहित्य व कलाया सिर्जना यानाः न्हू पुस्तायात लँ क्यनेगु स्वयेमाः धयादिल ।

नेमकिपाया सचिव नापं सांसद प्रेम सुवालं शिक्षा, स्वास्थ्यय् निःशुल्क यायेगु व्यवस्थाया निंतिं कुतः यायेमाःगु दु धासें २०२५ सालय् हे ख्वपय् सुस्ता अतिक्रमण व भ्रष्टाचार विरद्ध संघर्ष न्ह्याकूगु नेमकिपां न्हय्क्वःगु महाधिवेशन वइगु असोज ३, ४ व ५ गते स्वन्हुयंकं ख्वपय् जुइगु जानकारी बियादिल ।

ख्वप जिल्लाया प्रमुख जिल्ला अधिकारी नारायणप्रसाद भट्ट, ख्वप नगरपालिकाया उपप्रमुख रजनी जोशी व प्रमुख प्रशासकीय अधिकृत यामलाल कँडेलं नं नवानादीगु ज्याझ्वलय् मूल्यांकन समितिपाखें नेपालभाषा साहित्य तःमुँज्या गुथिया मू नायः जनकवि चन्द्रबहादुर उलकं ख्वप नगरपालिकां ग्वसाः ग्वःगु ख्यालः च्वयेगु कासाया लिच्वः न्यंकादीगु खः ।

ख्वप नगरपालिकां थुगुसी गुंपुन्हिया लसताय् ग्वसाः ग्वःगु ख्यालः कासाय् जय प्रजापतिया ‘दुई तिहाइ कन्स्ट्रक्सन’ न्हाप, हरिकृष्ण दुवालया ‘छेँ धलान, बुँ चलान’ लिउ, पलिस्था रंजितकारया ‘अस्टे«लिया रोजगार’ लियांलिउ व रश्मी खड्गीया ‘निश्कासन’ हःपाः सिरपाः त्याकेत सफल जूगु खः ।

अथे हे विश्वकर्मा भैलः प्याखं पुचःया लाखे व कवंचा, तःमधि देवी प्याखं खलःया देवी प्याखं, मुस्याख्वः समूहया ख्याः प्याखं व खिछेँ दाफा भजन खलःया नागाचा प्याखं छसिकथं न्हाप, लिउ, लियांलिउ व हःपाः सिरपाः त्याकेत ताःलाःगु दु ।सांस्कृतिक विधाय् उत्कृष्ट जुइत सफल जूगु पुचःयात स्वीद्वः, नीप्यद्वः व झिंच्याद्वः तका दांलिसें हनापौं नं लःल्हाःगु खः । ज्याझ्वः ख्वप नगरपालिकाया प्रमुख सुनील पजापतिया सभापतित्वय् जूगु खः ।

सम्बन्धित बुखँ

LEAVE YOUR COMMENTS