ने. सं. ११४३ तछलाथ्व त्रयोदशी -

प्रदेश २ लय् संविधान दिवस न्यायेकेगु खँय् विवाद

येँ – संविधान दिवस न्यायेकेगु सम्बन्धय् प्रदेश २ सरकार दुने हे विवाद ब्वलंगु दु । प्रदेश सरकारं संविधान दिवस तःजिक न्यायेकेगु निर्णय यायेवं सरकारय् दुथ्याःगु राष्ट्रिय जनता पार्टीया मन्त्रीतय्सं असन्तुष्टि प्वंकूगु दु । प्रदेश सरकारया मन्त्रिपरिषद बैठकं मुख्यमन्त्री लालबाबु राउतया प्रस्ताव पारित यासें वइगु असोज ३ गते संविधान दिवस तःजिक न्यायेकेगु निर्णय याःगु खः ।

प्रदेशया मन्त्रिपरिषदं संविधान दिवस न्यायेकेगु निर्णय याःगु खःसां नं राष्ट्रिय जनता पार्टी (राजपा) या मन्त्रीतय्सं धाःसा निर्णय बारे थःपिंत जानकारी मदुगु खँ धाःगु दु । भौतिक पूर्वाधार तथा विकास मन्त्री जितेन्द्र सोनालं निर्णय बारे जानकारी मदुगु धासें अज्याःगु निर्णय याःगु बैठकय् थःम्हं ब्वति मकयागु खँ धाःगु दु ।

वय्कलं संविधान घोषणा जूगु न्हि कुन्हु हाकूगु न्हि कथं हयेगु निर्णय यानागु धासें आः हे दीपावली न्यायेकेगु अवस्था मवःगु खँ कनादिल । संविधान दिवसया झ्वलय् प्रदेश सरकारं डेंगु व लागू वासः विरुद्ध जनचेतनामूलक अभियान न्ह्याकीगु जूगु दु ।

मन्त्रिपरिषदया निर्णय कथं वइगु असोज २ गते डेंगुपाखे बचे जुइगु उपाय व लागू वासः नियन्त्रणया निंतिं जनचेतना मूलक ज्याझ्वः यायेगु व ३ गते संविधान दिवसया न्हि कुन्हु सरसफाई यायेगु लिसे सिमा पीगु ज्याझ्वः तयातःगु दु । वय्कलं न्ह्यःने धयादी, ‘कफ्र्यु तयाः, गोली चले यानाः, मनूतय्त कुनाः, मुद्दा तयाः संविधान घोषणा याःगु दु, उगु संविधानयात थःपिंसं अझ नं माने मयानानि ।’