
येँ – सत्तारुढ पार्टी नेपाल कम्युनिष्ट पाटी (नेकपा) या विद्यार्थी संगठनपाखें म्हिगः गृहमन्त्री रामबहादुर थापायात नापलानाः नेपाल प्रहरीया आईजीपीयात बर्खास्त यायेमाः धकाः ज्ञापनपौ बीवं उगु विद्यार्थी संगठन दुने हे विवाद पिहां वःगु दु । थ्व ज्ञापनपौ नेकपा दुने दुथ्याःगु पूर्व एमालेया विद्यार्थीतय्सं बिउगु धासें पूर्व माओवादीया विद्यार्थीतय्सं विरोध प्रकट याःगु खः । निगू पार्टी एकीकरण जूसां नं निगुलिं दलया विद्यार्थी संगठनत धाःसा आः तक एकीकरण मजूनि । उकिया तयारी तिनि जुयाच्वंगु दु ।
म्हिगः एमाले अखिलया अध्यक्ष नवीना लामा व माओवादी अखिलया अध्यक्ष रञ्जित तामाङ सहितया पुचलं गृहमन्त्री थापायात नापलानाः प्रहरी प्रमुख सर्वेन्द्र खनालयात बर्खास्त यायेमाःगु ज्ञापनपौ लःल्हाःगु खः । सत्तारुढ दलया भातृ संगठनपाखें हे प्रहरीया आइजीपीया राजीनामा माग याःगु खनाः स्वयम् उगु हे पार्टीया मेपिं नेतात समेत अजूचायाच्वंगु दु । थ्व ज्ञापनपौयात कयाः खास यानाः पूर्व माओवादी अखिलया विद्यार्थी नेतात तम्वयाच्वंगु दु । अखिल क्रान्तिकारीया उपाध्यक्ष दिपेश पुनं विद्यार्थी संगठनतय्सं सरकारया छम्ह कर्मचारीयात बर्खास्त यायेमाः धकाः ज्ञापनपौ बीगु सम्भव हे मदुगु खँ कनादीगु दु । वय्कलं थ्व ज्ञापनपौ बीगु बारे संगठन दुने बांलाक सहलह हे मजूगु खँ नं कनादिल ।
गृहमन्त्री थापा माओवादीपाखें वःम्ह व आइजीपी खनाल नं माओवादी हे बलं वःम्ह जूगुलिं एमालेया नेतातय्सं प्रतिशोध कथं अज्याःगु ज्ञापन बिउगु आशंका नं अखिल क्रान्तिकारीं याना हःगु दु । निर्मला पन्त काण्डय् सरकारयात प्यखेरं घेराबन्दी जुयाच्वंगु इलय् सत्तारुढ संगठनपाखें हे थज्याःगु ज्ञापनपौ बीबलय् सरकारयात झन् हे मछिंका बीगु खँ धयाहःगु दु ।
थ्वहे झ्वलय् निर्मला पन्त बलात्कार लिपा हत्याकाण्डय् अपराधीयात कारवाही यायेमाः धइगु माग यासें म्हिगः सिंहदरवार पिने धर्ना बीगु ज्या जुल । अधिकारीकर्मीतय्सं म्हिगः सिंहदरवारया दक्षिण गेटया पिने धर्ना बिसें हत्यारायात याकनं कारवाही या धकाः नाराबाजी समेत याःगु खः ।
LEAVE YOUR COMMENTS