थुगुसी देय्न्यंकं तःजिक न्हूदँ हनीगु
येँ – नेपाल संवत् ११४२ या न्हूदँ थुगुसी तःजिक हनीगु जूगु दु । थगुने हलिंन्यंकं न्यना वंगु कोरोना महामारीं यानाः न्हूदँया ज्याझ्वःत तःजिक मन्यायेकूगु खःसा थुगुसी कोरोनाया महामारी म्हो जुया वंगु कारणं न्हूदँ ज्याझ्वः हनेगु ग्वसाः जूगु खः । निदँ तक न्हूदँया ज्याझ्वः तःजिक मन्यायेकूगु कारणं थुगुसी न्हूदँ हनेगु सवालय् तःधंगु उत्साह वयाच्वंगु खँ ग्वसाः खलकं धाःगु दु ।
थ्व झ्वलय् थौं न्हूदँया लसताय् येँया बसन्तपुलिं दँय्दसं थें तःजिगु सांस्कृतिक ¥याली पिकायेगु ग्वसाः जुयाच्वंगु दु । नेपाल संवत् न्हूदँ राष्ट्रिय समारोह समिति–११४२ या लसताय् उगु सांस्कृतिक र्याली पिकायेत्यंगु खः । बसन्तपुलिं पिहां वइगु उगु ¥यालीइ आपालं बाजं, खलः, पुचःतय्सं ब्वति काइ । येँया थःने व क्वःने चाःहिलाःलि हानं बसन्तपुली तुं लिहां वयाः मू सभा जुइ । न्हूदँ समारोह समिति–११४२ या नायः निरञ्जनरत्न शाक्यया सभापतित्वय् जुइगु उगु ¥यालीइ मूपाहां कथं प्रधानमन्त्री शेरबहादुर देउवां ब्वति कयादीगु ग्वसाः दु ।
अथे हे थौं हे सुथय् ७.३० बजे थिमिइ नं प्रधानमन्त्री शेरबहादुर देउवापाखें राष्ट्रिय विभूति शंखधर साख्वाःया झ्वाताय् स्वां देछाइगु ज्याझ्वः दु । राष्ट्रिय विभूति शंखधर साख्वाः राष्ट्रिय प्रतिष्ठानया ग्वसालय् जुइगु उगु ज्याझ्वलय् नेपाल संवत्या तिथि स्वयेगु सम्बन्धी एप्स व नेपाल संवत्या कोडिङ व डिकोडिङ यायेगु डिजिटल प्रणाली नं विमोचन याइगु ज्याझ्वः दु । उकथं हे थौं यल व ख्वपय् नं न्हूदँया सांस्कृतिक ¥याली पिकाइगु ग्वसाः दु ।
उकथं हे थौं न्हूदँ ११४२ या लसताय् येँनं मोटरसाइकल ¥याली नं पिकाइगु ग्वसाः दु । टाइम्स एफएमया ग्वसालय् थनया ब्रम्ह त्वालं उगु ¥याली पिहां वइगु ग्वसाः दु । थ्व मोटरसाइकल ¥याली येँनं शुरु जुयाः थीथी लागा चाःहिलाः धौख्यः तक थ्यंकेगु खँ ग्वसाः खलकं धाःगु दु ।
अथे हे न्हूदँया लसताय् म्हिगः किपुली नं न्हूदँया बारे अन्तक्र्रिया ज्याझ्वः जूगु दु । किपुली थौं न्हूदँया लसताय् सांस्कृतिक ¥याली नं पिकाइगु ग्वसाः दु । अथे हे थुगुसी न्हूदँया लसताय् येँनं पिने नं थीथी जिल्लाय् थीथी कथंया ज्याझ्वःत याइगु ग्वसाः दु । थौं न्हूदँ कुन्हु विशेष यानाः थीथी जिल्लाय् सांस्कृतिक ¥याली पिका– इगु नं ग्वसाः दु ।
अथे हे न्हूदँया लसताय् म्हीग येँया डल्लु व १९ वडाया इनाय् त्वालं सुकुन्दा ¥याली नं पिकाःगु दु । अथे हे न्हूदँया लसताय् थीथी थासय् मैनमत ¥याली नं पिहां
वःगु दु । नेपाल संवत्या न्हूदँ ज्याझ्वः थौंकन्हय् नेपालं पिने थीथी देशय् नं न्यायेकेगु याना वयाच्वंगु दु । थौंकन्हय् अमेरिका, बेलायत, जापान, अष्ट्रेलिया, क्यानाडा आदि देशय् नेवाः परम्परा कथं म्हपुजा समेत यानाः न्हूदँ हनेगु चलन जुयाच्वंगु दु ।
शंखधर दिवस ज्याझ्वः
न्हूदँया ज्याझ्वः लिपा नेपाल संवत्या प्रवर्तक शंखधर साख्वाःयात राष्ट्रिय विभूति घोषणा याःगु न्हिया लुमन्तिइ दँय्दसं कछलाथ्व दशमि कुन्हु शंखधर दिवस हनेगु यानाच्वंगु दु । थुगु दँय् नं दशमि कुन्हु सुथय् थनया लखुतिर्थय् सभा यानाः शंखधर दिवस हनेगु ग्वसाः दु । अथे हे वकुन्हु सनिलय् शंखधर पार्कय् (पुलांगु रत्नपार्क) दीपावली याइगु ग्वसाः दु ।
थुगु दँय् बागमति प्रदेश लगायत न्हय्गुलिं हे प्रदेशया सरकारयात नेपाल संवत्यात व्यवहारय् छ्यलाबुलाय् हयेगु लिसें थीथी माग नापं तयाः ध्यानाकर्षण पौ लःल्हायेगु ज्याझ्वः दु । नेपाल संवत्या थीथी पक्ष जनजनय् थ्यंकेत थीथी लागाय् प्रशिक्षण न्ह्याकेगु लिसें नेपाल संवत् आन्दोलनय् योगदान यानादीपिंत हनेगु ग्वसाः न्हूदँ समारोह समितिं दयेकाच्वंगु खँ सीदुगु दु ।
नेपाल संवत् न्हूदँ राष्ट्रिय समारोह समिति संस्थागत यायेगु लिसें नेपाल संवत् अक्षय कोष नीस्वनेगु ज्या थुगु दँय् न्ह्याकीगु ग्वसाः दु । दँय्दसं थें थुगुसी नं भिंतुना साँस्कृतिक सनिल, सपूm ब्वज्या व नसात्वँसा ब्वज्याया ग्वसाः दु ।
LEAVE YOUR COMMENTS