लिभरपुलपाखें चेल्सी स्तब्ध

लन्दन – साविकया विजेता लिभरपुलं इंग्लिश प्रिमियर लिगय् लगातार निगूगु विजय प्राप्त याःगु दु। लिभरपुलं विजययात आत्मसात याःगु कासाय् उखे चेल्सीयात धाःसा न्हूगु सिजनय् धक्का लाःगु दु ।

प्रिमियर लिगय् लगातार निगूगु कासाय् नं विजय प्राप्त यायेगु झ्वलय् लिभरपुलं चेल्सीयात २-० गोलं बुकूगु खः । चेल्सीया घरेलु मैदानय् जूगु कासाय् लिभरपुलया निंतिं निगुलिं गोल सादियो मानें याःगु खः । न्हापां हाफय् चेल्सीया रक्षक क्रिश्चियन ह्याउँगु कार्ड नयाः मैदानं पिहां वनेवं चेल्सी १० म्ह कासामिइ सीमित जूगु खः ।

न्हापांगु हाफ गोलरहित बराबरीइ क्वचाःगु खःसा निगूगु हाफया १० गू मिनेटय् मानें लिभरपुलया निंतिं निगुलिं गोल याःगु खः । मानें निगूगु हाफया ५० व ५४ औं मिनेटय् गोल याःगु खः । पराजयलिसें चेल्सीयात न्हूगु सिजनय् धक्का लाःगु दु ।