जंगली पशुतय्सं दुःख बिउगुलिं सुर्ती पीगु शुरु

येँ- थःपिंसं पिना तइगु वा, छ्व, आल लगायतया बाली जंगली जनावरतय्सं जक नयाः हैरान जूपिं पर्साया किसानतय्सं आः थःपिनि बुँइ सुर्ती पीगु शुरु याना हःगु दु । सुर्तीया मायात जंगली जनावरतय्सं थिउ मवइगु जुयाः उमिसं थुकिया बाली शुरु यानागु खँ धाःगु दु । बुँइ सुर्ती पीगु थ्व ज्यायात किसानतय्त सूर्य टोबाकों ग्वाहालि यानाच्वंगु दु ।

सूर्य टोबाकों सुर्ती पीगु लागिं किसानतय्त पुसा लगायत हलंज्वलंया समेत ग्वाहालि बीगु यानाच्वंगु दु । लिसें न्ह्यव ध्यबा माःसा व नं बियाः लिपा सूर्ती फुक्क थःपिंसं न्याना कायेगु खँ नं धाःगु दु । थज्याःगु ग्वाहालि वःगु लिसें जंगली पशुतय्सं नं दुःख मबीगु जूगुलिं थौंकन्हय् अनया स्वद्वःम्ह किसानतय्सं करिब द्वःछि बिघा बुँइ सुर्ती पीगु शुरु याना हःगु खः ।