डेनमार्कय् न्हूदँ व म्हपुजा ज्याझ्वः

येँ(नेपालभाषा टाइम्स)÷ नेपालं पिने च्वनाच्वंपिं नेपाःमिपिंसं नं नेपाल संवत् न्हूदँ थीथी ज्याझ्वः यासें हंगु दु । नेपाल संवत् ११४३ न्हूदँया लसताय् कछलाथ्व पारुकुन्हु सुथय् भिंतुना सांस्कृतिक ¥याली यानाः भिंतुना कालबिल यायेगु नापं सनिलय् मंकाःकथं म्हपुजा याःगु दु ।

थ्व झ्वलय् युरोपेली राष्ट्र डेनमार्कय् नं तःजिक भिंतुना कालबिल व म्हपुजा ज्याझ्वः याःगु दु । नेवाः गुथि डेनमार्कया ग्वसालय् दँय्दसं थें थुगुसी नं कछलाथ्व पारुकुन्हु न्हूदँया भिंतुना कालबिल यायेगु ज्याझ्वः याःगु दुसा सनिलय् सकल नेपाःमिपिं मुनाः म्हपुजा याःगु खः ।

गुथिया नायः राम महर्जनं भिंतुना कालबिल ज्याझ्वःलिसें म्हपुजा यायेत झायादीपिंत लसकुस यानादीगु खः । गुथिया संस्थापक शशि श्रेष्ठं बियादीगु जानकारीकथं डेनमार्कय् च्वनाच्वंपिं नेपाःमिपिनिगु उपस्थितिइ सांस्कृतिक सनिल ज्याझ्वःलिसें दक्वं समुदायया उत्साहपूर्वक सहभागिताय् नेवाः समुदायया मौलिक परम्परा म्हपुजा ज्याझ्वः याःगु खः । वय्कलं बियादीगु जानकारीकथं करिब ७० म्हेसित म्हपुजा याःगु खः ।

झीगु संस्कृति, झीगु परम्परा व झीगु गौरव धइगु मूलमन्त्रलिसें विदेशी भूमि डेनमार्कय् थीथी कारणं च्वनाच्वंपिं नेपाःमि दथुइ वंगु छगू दशकनिसें थुकथंया ज्याझ्वः याना वयाच्वनागु संस्थापक श्रेष्ठं कनादिल ।

डेनमार्कय् च्वंगु आपालं संघसंस्थाया सहभागिता दुगु ज्याझ्वलय् ब्वति कयादीपिं मस्तनिसें मिसापिंसं परम्परागत नेवाः वसः पुनादीगु व ब्वति कयादीपिंसं नं थःपिं नेपालय् दुगु अनुभूति याःगु वय्कलं कनादिल । म्हपुजाय् ब्वति कयादीपिं सकसिनं नेवाः नसाज्वलं नकूगु खः ।

डेनमार्कय् नेवाः कला, संस्कृतिया प्रवद्र्धन, प्रचार प्रसार व संरक्षणया ज्याय् सक्रिय जुयाच्वनादीपिं राम महर्जन, शशि श्रेष्ठ, रवि श्रेष्ठ, राजमान महर्जन, गौरव महर्जन, बादल महर्जन, उज्वल महर्जनया सक्रिय सहभागितां ज्याझ्वः ताःलाःगु गुथिं जानकारी बिउगु दु ।