आर्थराइटिसया लक्षण व उपचार

आर्थराइटिस आपाःसित जुइगु साहा (जोर्नी) या समस्या खः । थ्व धयागु साहा ज्यलीगु खः । साहा ज्यलीगु कारण तःता हे दु। उमेर थहां वंलिसे साहा ज्यलीगु छगू सामान्य खँ खः । अले थ्व हे कारण खः कि यक्व उमेर दयेधुंकूपिं ज्याथजिथित खास यानाः ५छ निसें ६० दँ दये धुंकूपिं मनूतय्के थ्व समस्या यक्व हे दु। व्यायाम मयाइगु, अप्वः ल्ह्वनीगु, ज्या यायेगु व आधुनिक जीवनशैलीं यानाः थौंकन्हय् म्हो उमेरयापिं मनूतय्त आर्थराइटिस ल्वय् जुइगु जुयावःगु दु। ख ला आर्थराइटिस साहाया ल्वय् खः, तर थुकिं नुगःस्येँ, स्वँ, जलस्येँ व हिनुलिइ नं प्रभाव लाकेफु ।

आतकया दुने सछि किसिमयागु आर्थराइटिस लुइके धुंकूगु दु। अथे खःसां अप्वः थें मनूतय्त जुइगु धाःसा ओष्टियो आर्थराइटिस व रुमेटाइड आर्थराइटिस खः । ओष्टियो आर्थराइटिसं पीदँ स्वयां अप्वः उमेर दयेधुंकूपिं मनूत विशेष यानाः मिसातय्त दकलय् अप्वः प्रभावित याः । थुकी म्हया बोझ ल्ह्वनीगु पुलिया साहा दकलय् अप्वः प्रभावित जुइ । रुमेटाइड आर्थराइटिसया साहाया लिसेलिसें छुं छुं मेमेगु अंग अथवा म्ह छम्हं हे प्रभावित जुइ । थ्व अप्व थें २५–३५ दँ दुपिं मनूतय्त जुइगु खः । ल्हाः तुतिया साहालय् स्याइगु, मना वइगु व मांसपेशी बमलाइगु थेंज्याःगु लक्षण खनेदयावइ । रुमेटाइड आर्थराइटिस ओस्टियो पोरोसिसया निंतिं छगू रिस्क फ्याक्टर खः । थ्व साहा ज्यलीगुया छगू मुख्य कारण खः, रुमेटाइड आर्थराइटिस न्ह्यागु उमेरय् नं जुइफु ।

गाउट
गाउट छगू मेकथंया आर्थराइटिस खः । थ्व अन्तर्गत म्हय् युरिक एसिड अप्वइगु खः, गुकिं साहाया कार्टिलेजयात नोक्सान याइ । यूरिक एसिड मांसपेशी व नसाय् मुनाः साहायात जाम यानाबी । लिपा वनाः थ्व समस्यां आर्थराइटिसया रुप धारण याइ । कचिगु क्वेँय् स्यनीगु, उकी इन्फेक्सन जुइगु अथवा हि दाइगु अथवा छुं कथंया दुर्घटनाय् लानाः जूगु चोटया कारणं नं आर्थराइटिस जुइफुल ।

जुभेलाइन आर्थराइटिस
मस्तय्त जुइगु आर्थराइटिसयात जुभेलाइन आर्थराइटिस धाइ । छगू अनुमान कथं द्वःछिइ स्वम्ह मस्त आर्थराइटिसं प्रभावित जुइगु जुयाच्वंगु दु। अमेरिका छगू देशय् जक हे निगू लाख चय्न्याद्वः मस्तय्त जुभेलाइन आर्थराइटिस जुयाच्वंगु दु ।

एंकलोजिंग आर्थराइटिस
ल्याय्म्हया वैंशय् जुइगु आर्थराइटिसयात एंकलोजिंग आर्थराइटिस धाइ । आर्थराइटिसया समस्या मिजंतय्त स्वयां मिसातय्त अप्वः जुइ । छगू अनुमान कथं मिजंतय्के स्वयां मिसातय्के थ्व ल्वय् स्वदुगं अप्वः दु ।

आर्थराइटिसया लक्षण
आर्थराइटिसया थीथी लक्षण मध्ये साहा साहा स्याइगु, साहा कय् कुनीगु, पलाः छीगु पहलय् हिउपाः वइगु, सुथय् दनेबलय् साहा कक्रक च्वंच्वनीगु व ज्वर मुख्य खः । आर्थराइटिसया उपचार आर्थराइटिस ल्वचं मकयेका च्वनेगु खःसा नियमित व्यायाम यायेमाः, अले नये त्वनेगु व रहन सहनय् विशेष ध्यान बीमाः । आर्थराइटिस जुइबलय् उपचार यायेलिबाका च्वनेमजिउ। छाय्कि थुकिं साहालय् वासः यानां हे मजीक क्षति जुइफु । सुरुया अवस्थाय् पाय्छि कथं नये त्वनेगु, व्यायाम वा फिजियोथेरापी,योग वा थीथी वासः आदिया ग्वाहालिं थुकियात चर्को जुइमफयेक पनातये फइ ।

आर्थराइटिसया सर्जरी
आर्थराइटिस तसकं चर्को जुलकि वा साहालय् यक्व हे अप्वः विकृति वलकि ‘की होल’ सर्जरी वा साहायात हिलेगु सर्जरी अथवा मेमेगु शल्य तरिकाया ग्वाहालि कायेमाली । आर्थराइटिसं यानाः न्यासि वने हे मफये धुंकूपिं अले छगू कथं अपाङ्ग जीवन हनेत बाध्य जुइधुंकूपिं मनूतय्गु निंतिं की होल सर्जर वरदानया रुपय् न्ह्यःने वःगु दु ।

आर्थोस्कोपी छु खः ?

की होल सर्जरी (आर्थोस्कोपी) या निंतिं चीरफार यानाच्वने म्वाः । थुकिया निंतिं पुलिइ अथवा मेमेगु जोर्नीइ बागू सेन्टिमीटर निथाय् चिरिफाये माली । थुकिया निंतिं छन्हु जक अस्पताल च्वंसां गाः, अले अपरेशन लिपा ल्वगि बांलाक हे न्यासि वनेफइ । ल्वगियात नं बेहोस यायेमाः, न हि बीमाः । ल्वगि स्वन्हु प्यन्हु लिपा हे सामान्य कथं थःगु ज्या यायेफइ ।
थुगु अपरेशन लिपा पुलि जाम जुइगु, इन्फेक्सन जुइगु, अथवा मेमेगु जटिलता खनेदइगु आशंका मदु हे बराबर जुइ । थुकथंया सर्जरी आर्थराइटिसया शुरु शुरुया अवस्थाय् अप्वः सफल जू । थुगु सर्जरीया ग्वाहालिं पुलि व मेमेगु जोर्नीइ वःगु खराबी मदयेके फइ । पुलि सफा यायेफइ अले कटिलेज मुनाच्वंगु मदयेका छ्वयेफइ।
की होल सर्जरी आर्थराइटिस म्हसीकेगु व उपचार यायेगुली सफल साबित जूगु दु। थुकिं थ्व ल्वय्यात अझ अप्वः तच्वः जुइगुपाखें पने फइ । थुगु प्रविधिया ग्वाहालिं साहाया दुनेया पूवंक हे जाँच यायेफइ, अले दुनेयागु खराबी मदयेका छ्वयेफइ ।