तसकं चःति वइगुयात पनेगु गुकथं ?
चःति ‘स्वेट ग्लाय्ण्डस्’य् दयावइगु खः, गुगु झीगु म्हया छ्यंगूया तःलय् विशेष यानाः ल्हाःफ्वः, पालितः व छ्यंया छ्यंगूया तःलय् दइ । छम्ह मनूया म्हय् थुकिया ल्याः२० निसें ३० लाख तक दइ । मिसातय्के थ्व ग्लाय्ण्ड मिजंतय्के स्वयां अप्वः दइ, अय्नं टेस्टोस्टीरोन हार्मोनं यानाः उमिके मिजंतय्के स्वयां कम जक चःति वइ ।
चःति गबलय् थज्याःगु स्वेट ग्लायण्डय् दयावइ धयागु खँ झीगु न्ह्यपुया हाइपोथैलेमस भागपाखें संचालित जुइ । छुं नं कारणं झीगु म्ह क्वातकि हि नं क्वाइ, अले थ्व क्वाःगु हि न्ह्यपुया हाइपोथैलेमस भागय् थ्यनकि उकियात उत्तेजित यानाबी । म्हं पिनेया वातावरण तसकं गरम व सुख्खा जुलकि थ्व चःति वाफ जुयाः छ्यंगूयात ख्वाउँकेगु व प्याकातयेगु ज्या याइ ।
तांन्वइगु मौसमय् मनूया म्ह सामान्य तापक्रमय् लाकातयेत घौछिया बागू लिटर धयाथें चःति पिकयाहइ, गुकिं झीत सिचुगु अनुभव याकी । अथे ला चःति पिहां वइगु स्वास्थ्यया निंतिं बांलाः । छाय्कि थुकिं यानाः म्हया अनेतने दूषित पदार्थ पिहां वनी । तर माक्व स्वयां अप्वः चःति पिहां वलकि म्हय् लः व लवण नितां हे मगानावनी ।
अथे जुइबलय् झीत छ्यं स्याइगु, न्ह्यः मवइगु, लागिमिगि चायेमास्ति वइगु व लः मगानाः रक्त संचारय् पंगः वइगु जुइयः । लिच्वः कथं नुगःया धुकधुकी तच्वइ, अले म्हया तापक्रम थहां वनाः ज्वर वइ । सामान्य मात्राय् चःति वइगु धयागु बांलाःगु स्वास्थ्यया प्रतिक खः । चःति वलकि चिम्सप्वाः चालाच्वनी, अले छ्यंगूयात अक्सिजन चूलानाच्वनी ।
थुकिं यानाः छ्यंगू नाइसे च्वनाः चमकदार जुयावइ, तर यक्व चःति वइगु धयागु बांलाःगु खँ ख हे मखु । तांन्वइबलय् व जिम वनेबलय् चःति वइगु स्वाभाविक खः, तर चिकुलां हे चःति यक्व वइगु धयागु समस्या हे खः । धाथें ला स्वेट ग्लायन्डय् गडबडि, मानसिक तनाव, हार्मोनल चेन्जेज, मसलादार नसाज्वलं, अप्वः वासःया छ्यलाबुला व अप्वः ल्ह्वनीगु चःति यक्व वइगु थीथी कारण खः ।
मदिक्क चःति वयाच्वनकि शारीरिक जक मखु, मानसिक असहजता जुइ । थ्व लक्षणयात हाइपरहाइड्रोसिस धाइ । थ्व निगू कथंयागु दु । ल्हाः तुति व याक्व प्याइगु प्राइमरी वा फोकल हाइपरहाइड्रोसिस खः । थ्व समस्या २ वा ३ प्रतिशत मनूतय्त जू । तसकं हे यक्व चःति वइगु समस्यायात सेकेन्डरी हाइपरहाइड्रो्सिस धकाः धाइ ।
थुकिं पीडित मनूतय्त चिकुलां व आराम कयाच्वनीबलय् नं मदिक्क लः व चि मगानाः (डिहाइड्रेसन) जुइगु थीथी समस्या जुइ । अप्वः चःति मवयेकेगु थीथी उपाय–
मू ः मू सियाः निनादिसँ । थुकी लः तयाः पेस्ट दयेकाः क्वलं बुइ थें बुलादिसँ, तसकं चःति वयेगु दिनावनी ।
हलः ः हलः नचुक निनादिसँ । गनं चःति यक्व पिहां वयाच्वंगु खः, अन इलादिसँ । अथे इलाः१० मिनेट लिपा ख्वाउँलखं म्वःल्हुयादिसँ । तसकं चःति वयेगु दिनावनी ।
रहर ः छम्हू रहर, छगू चम्चा चि, बागू चम्चा सुंपालुचुं थ्व स्वतां ल्वाकछ्यानाः तूचिकनय् निनादिसँ । थुगु मिश्रणं मालिस यानाबिल धाःसा चःति वयेगु दिनावनी । सन्निपातया अवस्थाय् नं थ्व छ्यलेफु ।
भान्ता ः चःति मवयेकेत कचिगु भान्ताया रस पिकयाः ल्हाःफ्वलय् व पालितःलय् पानाबिइगु यायेमाः ।
फट्किरी ः निना तयागु फट्किरी छगू चम्चा निगू गिलास ख्वाउँलखय् संकाः ल्हाः तुति सिलादिसँ, चःति वइमखु ।
तेजपात ः तेजपात गंकाः निनादिसँ, अले लखय् तयाः दायेकाः २४ घन्टा अथें त्वःता तयादिसँ । थुकिया लखं उगु भागय् न्हिं न्हिं सफा यानादिसँ, गनं यक्व चःति पिहां वइगु खः । थुकिं चःति वयेगु कम यानाबी ।
आलु ः आलु चाःचाः तानादिसँ, अले म्हया गुगु भागय् अप्वः चःति वइगु खः, अन थुकिं ब्वब्वस्यानादिसँ । चःति वयेगु कम जुयावनी ।
गोलभ्यारा ः अप्वः चःति वलकि म्हय् लः व लवण मगानावनाः छ्यं स्याइगु न्ह्यः मवइगु लागिलागि चायावइगु व गबलें गबलें ला बान्ता नं जुइयः । अथे जुइबलय् झीसं थम्हं छुं निर्णय हे याये मफयावनी । म्ह ख्वाउँसे च्वनावनी ।
अले सासः फुइँफुइँ ल्हाये वइगु व नाडिया गति नं तेज जुइ । थथे जुइबलय् ल्वगियात गोलभ्याराया रसय् चि व लः ल्वाकछ्यानाः भचा भचा मात्रा यानाः बियांतुं च्वनेमाः । कागतिलखं नं म्हय् लवणया कमी मजुइका बीफु । क्वाःगु वातावरणय् ताउत ज्या यानाच्वनेबलय् प्वाः खालि जुइकाच्वने मजिउ ।
चि ः चःति वइगु नवल धाःसा चि कम जक भपीगु यानादिसँ ।
लः ः तुतिइ चःति यक्व वःसा न्हापालाक तुति क्वाःलखय् तयादिसँ । अनंलि ख्वाउँलखय् तयादिसँ, अले निपां तुति ल्वाकाः ब्वब्वस्यानादिसँ । अनंलि लखं पितहयाः तुति हुयादिसँ । छवाः तक थथे यात धाःसा यक्व हे फाइदा जुइ ।
म्वः ल्हुइगु ः नियमित म्वःल्हुयादिसँ । म्वःल्हुइगु लखय् बेकिंग सोडा छप्तिचा तयेगु ल्वःमंकादीमते । फुसा न्हिं निक्वः हे, म्वःल्हुयादिसँ, चःति वइगु कम जुइ ।
मेमेगु उपाय
म्वःल्हुइबलय् नीहः दुगु साब्वं छ्यलेफुसा बांलाइ ।
सिन्थेटिक कापःया थासय् सुति कापःया वसः पुनादिसँ ।
चःतियात पनीगु पाउडर बुलादिसँ ।
गर्मि महिनाय् सुथय् व बहनी म्वःल्हुयादिसँ ।
म्ह छम्हं ख्वाउँ लखं हे म्वःल्हुयादिसँ ।
म्वःल्हुइ धुंकाः भुवादारी रुमालं हुयादिसँ ।
कत्तिगु वसः पुनादी मते ।
कब्जियत जुइकादी मते ।
अप्वः ल्ह्वंकादी मते ।
फयांफछि निभालय् पिहां झायेमते ।
अप्वः चःति वइगु समस्याय् छु नयेगु ?
मल्ता व मेमेगु मसला कडा जुइक तयामतःगु नसाज्वलं, अले पौष्टिक व म्हयात सिचुकीगु नसाज्वलं नयेगु यायेमाः ।
वाउँगु हः दुगु तरकारि गथेकि ः पलः, मिचः, वाउँ धन्न्या, नवःघाँय्, बन्दा, आदि न्हिं न्हिंया ज्यःनां बेलिइ दुथ्याकेमाः ।
तुसि, खरबुजा थेंज्याःगु फलफुल नयेमाः । फसि, प्वलःचा, लौका थेंज्याःगु ठण्डी याइगु तरकारि नं नयेमाः ।
कागति लः त्वनादिसँ । थुकिं यानाः म्हय् लवणया कमि जुइमखु ।
गोलभ्याराया रस छगू कपया मात्राय् सुथय् बहनी त्वनादिसँ ।
धौ मही अप्वः त्वनादिसँ ।
न्हिं छुं मखुसां छगू कप ग्रीन टी त्वनेगु यात धाःसां नं चःति यक्व वइमखु ।
छु मनयेगु ?
पुकातःगु, सियातःगु, मसला यक्व तयातःगु व गरम याइगु नसाज्वलं मनयेगु ।
चि यक्व दुगु मनयेगु ।
अय्लाः चुरोट, च्या, कफि मत्वनेगु ।
एलोप्याथिकया गरम याइगु वासः मनयेगु ।
अंचुं, तितिसि व मेमेगु नं तसकं पाउँगु चीज मनयेगु ।
अप्वः चःति वःपिंसं स्ट्रबेरी, अंगूर व मस्र्याबरां यक्व नये मजिउ । थुकी सिलिकोन अप्वः मात्राय् दइ, थुकिं यक्व चःति वयेकी ।
LEAVE YOUR COMMENTS