स्यांगुलिइ नं दु यक्व फायदा

स्यांगुलियात खय् भासं कटुस व अंग्रेजी भासं हेजलनट धकाः धाइ । स्वन्तिबलय् तःसि ब्वय् मतसे मजिउ यानातःगु थ्व फल बरां थें छाइ, अले नयेबलय् चाकुचाकु माकुमाकु धाइ । थुकिया खेती संसार न्यंकभनं जू । अथे खःसां तुर्कि, इटली व अमेरिकाय् थुकिया उत्पादन यक्व हे जू ।

थ्व फलया रंग सियुसियु म्हासुम्हासु धाइ, अले ग्वःल्लाःगु निसें ख्येँ बांलूगु तक दइ । थुकी थीथी पोषकतत्व दु । गथे जुयाः थुकिं झीगु उसाँय्यात बांलाकातयेत ग्वाहालि यानाच्वनी । थुकी झीगु म्हयात यक्व हे ल्वय्पाखें रक्षा यानातयेगु क्षमता दु । थुकिया छुं छुं गुण थन न्ह्यथनाच्वना –

नुगःस्यँेयात बल्लाकी
स्यांगुलिइ अनस्याचुरेटेड फायट प्रशस्त दइ । थ्व नुगःस्येँया स्वास्थ्यया निंतिं फाइदाजनक जू । स्यांगुलिइ ओलिक एसिड दु, गुकिं हिइ बांमलाःगु कोलेस्ट्रोलयात कम यानाः भिंगु कोलेस्ट्रोलयात अप्वयेकाबी । नियमित रुपं स्यांगुलि नयेगु यानाच्वन धाःसा कोलेस्ट्रोल २७ प्रतिशत तक कम यायेफइ ।

थीथी अध्ययनं सिइदये धुंकूगु दु कि स्यांगुलिया सेवनं हिनुलिइ पंगः थनीगु व हिनूया अंगलय् मुनीगु मभिंगु कोलेस्ट्रोलया अक्सिकरणयात कम यायेफइ । छगू रिसर्च कथं नियमित रुपं स्यांगुलि नयेगु यानाच्वनीपिंत हर्ट अटाय्क जुयाः सीगु सम्भावना ५० प्रतिशत तक म्हो जुइ । थ्व बाहेक थुकी नुगःस्येँयात स्वस्थ यानातयेत म्याग्नेसियम नं प्रशस्त मात्राय् दइ ।

फोलेट व भिटामिन ई
अप्वः थें नट्सया अःखः स्यांगुलिं (हेजलनट) व फोलेटया बांलाःगु स्रोत खः । फोलेट प्वाथय् दुपिं मिसातय्त यक्व हे फाइदा बीगु तत्व खः । थुकिं मेगालोब्लास्टिक एनीमिया व मस्तय्गु थीथी तन्त्रिका दोषयात पनेत ग्वाहालि याइ । थुलि बाहेक स्यांगुलि भिटामिन ईया नं बांलाःगु स्रोत खः ।

भिटामिन ईं ह्याउँगु हिकोषया विघटनयात नं पनी । अले एनीमियाया खतरा कम याइ । ब्लडया पाय्छि सर्कुलेशन प्रतिरक्षा प्रणालीयात बल्लाका तयेत व ज्वर व सर्दी व मेमेगु ल्वय् मजुइकातय्त नं ग्वाहालि याइ ।

क्यान्सर मजुइकातइ
स्यांगुलिं क्यान्सर कोषया विकासया नेतृत्व याइगु कारक तत्वयात खत्तम याइगु फल कथं नं म्हसिउ । थुकिं म्हय् दुगु दुष्ट कोषयात शान्त यायेत ग्वाहालि याइ । स्यांगुलिइ दुगु बीटासिटोस्टेरोल दुरुपा व प्रोस्टेट क्यान्सरया खतरायात कम याइ । गुलिखे अध्ययनं पिकाःगु निष्कर्ष कथं स्यांगुलिइ दुगु छताजि भिटामिन ई (अल्फा टोकोफेरोलं) ब्लाडर (च्वप्वःचा) क्यान्सरया खतरा छुं मखुसां ५० प्रतिशत कम यानाबी ।

थ्व बाहेक स्यांगुलिइ दुगु म्याग्नीजया प्रशस्त मात्रां ताःई तक क्यान्सरपाखें रक्षा यानातइ । म्याग्नीज क्यान्सर एन्टीअक्सिडेन्ट एन्जाइमया छगू घटक खः, गुगु क्यान्सरपाखें म्हया रक्षा यायेत कोषयागु माइटोकोन्ट्रियाय् उत्पादित जुइ ।

मांसपेशी व क्वँय् बल्लाकी
म्याग्नेसियमं क्याल्सियमया मात्रायात म्हय् दुत हयेत व पित छ्वयेत महत्वपूर्ण भूमिका म्हिती । क्याल्सियमया पाय्छि मात्रां मांसपेशीयात कय्कुंकेगु व चकंकेगु ज्याय् ग्वाहालि याइ । थुकिं मांसपेशीइ तनाव, त्यानुइगु, स्याइगु व म्वय्म्वय् द्याइगु आदिपाखें बचे याइ ।

म्याग्नेसियमया उच्चस्तरं मांसपेशिया तागत अप्वयेकेत ग्वाहालि याइ । थ्व बाहेक स्यांगुलिइ म्याग्निज नं प्रशस्त दु । थ्व मिनरल क्वँय्या विकास यायेत व बल्लाकेत मदयेक मगाः । स्यांगुलिं म्याग्नेसियम स्केलेटल अप्वयेकी, अले ओष्टियो पोरोसिसलिसे ल्वाइ ।