थःपिनिगु भुक्तानीया ग्यारेन्टी जुइमाःगु मेलम्चीया सहायक ठेकेदारया माग

येँ – मेलम्ची खानेपानी आयोजनय् मू ठेकेदारया निंतिं ज्या यानाच्वंपिं पीप्यंगू सहायक ठेकेदारपिंसं १ अर्ब ५० करोड भुक्तानी मबिल धाःसा ज्या दिकेगु ख्याच्वः बिउगु दु । मंगलवाः येँ पत्रकार सम्मेलन यासें उमिसं सरकारया कारण थःपिंत ठेकेदारपाखें भुक्तानी मवःगु धासें तत्काल ध्यबा मबिल धाःसा ज्या दिकेगु ख्याच्वः बिउगु खः ।

सहायक ठेकेदार पिंसं सीएमसीपाखें थ्यं मथ्यं १ अर्ब ५० करोड भुक्तानी कायेगु ल्यँ दनिगु जानकारी नं पत्रकार सम्मेलनय् बिउगु खः । ठेकेदारपिंसं मेलम्ची आयोजनायात क्वःछिनातःगु इलय् क्वचायेकेत नेपाःमिपिसं आयोजनाय् बैंकं त्यासा कयाः व छेँ बुँ मियाः लगानी यानागु व उगु लगानी उठे यायेगु निंतिं सरकार गम्भीर जुइमाःगु उमिगु इनाप दु ।

ठेकेदारपिसं पत्रकार सम्मेलनय् न्यागू बुँदाया माग नं न्ह्यब्वःगु दु । सहायक ठेकेदारपिसं आयोजनाया आः तक पुलेमाःगु भुक्तानी याये न्ह्यः ल्यँ दनिगु ध्यबा नेपाली व्यवसाय लिसे ज्या याइपिंत पुलेगु सर्तय् सीएमसीयात भुक्तानी सरकारं यायेमाःगु, छुं कारणं ठेक्का रद्द जुइगु अवस्था वलधाःसा सीएमसीया धरौटी वा भुक्तानी यायेत न्ह्यः फुक्कं ल्यँ दनिगु ध्यबा रिटेन्सनपाखें नेपाली व्यवसायपिंत सरकारं भुक्तानी यायेमाःगु, खानेपानी थेज्याःगु संवेदनशील राष्ट्रिय गौरवया आयोजना क्वछिनातःगु इलय् क्वचायेकेत कार्यतालिका सार्वजनिक यायेमाःगु व आयोजना न्ह्याके माःगुु माग याःगु दु ।

सीएमसी पीडित नेपाःमि पुचःया संयोजक इन्जिनीयर श्रीराम न्यौपाने आयोजना क्वचायेकेत लिपांगु चरणय् थ्यंकूपिं नेपालीया उपकरण, नेपाली श्रम व नेपाःमिया लगानी सितिं वने मबित सरकार गम्भीर जुइमाःगु खँ कनादिल । वय्कलं धयादी, ‘आयोजना क्वचायेकेत झि नेपाःमिपिसं मू भूमिका म्हितागु खँ सकसिनं सिउ ।

आः सरकार जिमित भुक्तानी यायेगु सर्तय् जक थुगु आयोजनाया मू ठेकेदार सीएमसीयात भुक्तानी यायेमाः ।’ सरकारया पाखें थःपिनिगु माग संबोधन जुइगु थःपिंत पूर्ण विश्वास दुगु खँ धासें न्यौपाने थ्वहे विश्वास थःपिंसं आः तक ज्या याना वयाच्वनागु खँ कनादिल ।

अथेहे ठेकेदारतय्सं थःपिनगु माग सरकारं इलय् संबोधन मयातः धाःसा ‘नो सप्लाई, नो वर्क’ कथं ज्या दिकेगु ख्याच्वः नं बिउगु दु । उमिसं सामान ढुवानी मयायेगु व ज्या नं मयायेगु निंतिं सहित कडा प्रस्तुत जुइगु ख्याच्वः बिउगु खः ।