योजना आयोगया दुजः तयाः चिनीया भाः समायोजन याइगु

येँ – उद्योग वाणिज्य तथा आपूर्ति मन्त्री मातृका यादवं योजना आयोगया सदस्यतय् सहभागीताय् चिनीया भाः समायोजना यायेगु खँ धयादीगु दु । प्रतिनिधि सभा अन्तर्गत उद्योग तथा वाणिज्य, श्रम तथा उपभोक्ता हित समितिया मंगलवाः चिनि उद्योग सम्बन्धय् जूगु सहलहय् मन्त्री यादवं थ्व खँ धयादीगु खः ।

समितिं मन्त्री यादवयात चीनया भाः तोके यायेत निर्देशन बिउगु इलय् मन्त्री यादवं सरकारं चिनीया भाः क्वःछिइ मिले मजू धासें योजना आयोगया सदस्यतय् सहभागिताय् चिनीया भाः समायोजन यायेगु खँ धयादीगु खः ।

सहलहय् चिनि उद्योग संघया अध्यक्ष शशिकान्त अग्रवालं चिनिइ थःपिंत २० प्रतिशत मखु ७ प्रतिशत जक मुनाफा दइगु सुनिश्चित यानाबिउगु गाः धयादीगु खः । सहलहय् समितिया सभापति विमल श्रीवास्तवं चिनी उद्योगीतय्सं तु मिउपिं किसानतय्त याकनं भुक्तानी बीत निर्देशन नं बियादीगु दु ।