चीन व भारतपाखे न्हय्गू अन्तदेशीय प्रसारण लाइन

येँ – सरकारं निगू जःलाखःला देय्या न्हय्गू नाकापाखें अन्तरदेशीय प्रशारण लाइन दयेकेगु ज्यायात रणनीतिक रुपं न्ह्यःने यंकीगु जूगु दु ।सरकारं रसुवागढी केरुङ व किमाथांकापाखें चीनलिसे प्रशारण लाइन स्वाइगु कथं रणनीतिक योजना न्ह्यःने हःगु दु । रसुवागढी केरुङ अन्तरदेशीय प्रसारण लाइन दयेकेगु निंतिं पूर्व सम्भाव्यता अध्ययन जुइधुंकूगु दु । पूर्वया किमांथांकापाखें चीन स्वाइगु प्रशारण लाइन दयेकेगु निंतिं अध्ययन प्रक्रिया न्ह्याकूगु दु ।चीनपाखे दयेकीगु प्रसारण लाइनया क्षमता ४०० केभीया जुइ । अथेहे दक्षिणी जःलाखःला देय् भारतलिसे थौंकन्हय् ढल्केबार–मुजफ्फपुर अन्तरदेशीय प्रसारण लाइन दयेकाः संचालनय् वयेधुंकूगु दु । थौंकन्हय् १३२ केभी क्षमतां संलचानय् वयाच्वंगु उगु प्रशारण लाइनया क्षमता नं अप्वयेकाः ४०० केभी थ्यंकेगु निंतिं नं तयारी जुयाच्वंगु दु ।

अथेहे सरकारं न्यू बुटवल गोरखपुर अन्तरदेशीय प्रसारण लाइन दयेकेगु निंतिं थ्वयां न्ह्यः नं सम्भाव्यता अध्ययन क्वचायेकेधुंकूगु दु । थ्व प्रसारण लाइन नं ४०० केभी क्षमताया हे जुइ । नेपाः व भारतया ऊर्जा सचिवस्तरीय संयुक्त समितिइ थ्व प्रसारण लाइन दयेकेगु विषयय् दत्या न्ह्यव हे सहमति जुइधुंकूगु दु ।अथेहे सरकारं आः संचालनय् वयाच्वंगु रक्सौल परवानीपुर अन्तरदेशीय प्रसारण लाइनया नं क्षमता विस्तार यायेगु योजना दयेकाच्वंगु दु । थौंकन्हय् थ्व प्रशारण लाइन १३२ केभीया खः । थ्व प्रशारण लाइनं थौंकन्हय् ५० मेगावाट मत आयात जुयाच्वंगु दु ।अथेहे पूर्वया कुशाहा कटैया प्रसारण लाइन विस्तार यायेगु योजना दु । थ्व अन्तरदेशीय प्रसारण लाइनपाखें थौंकन्हय् १२५ मेगावाट मत आयात जुयाच्वंगु दु ।

क्षमता अप्वयेकाः थ्व प्रसारण लाइनयात नं४०० केभीइ हे विस्तार याइ । अथेहे बाँके–लखनउ ४०० केभी व अतरिया जुयाः भारत स्वाइगु मेगु प्रसारण लाइन दयेकेगु निंतिं नं प्रस्ताव याःगु दु । थ्व प्रसारण लाइ नं ४०० केभीया हे जुइ ।अन्तरदेशीय प्रसारण लाइनयात थप व्यवस्थित यायेत देय् दुने खुसि बेसिनया आधारय् ४००÷४०० केभीया प्रसारण लाइन, मध्यपहाडी राजमार्गया समानान्तर रुपं ४०० केभी व पूर्व पश्चिम राजमार्गया समानान्तर रुपं ६६४ केभी क्षमताया प्रसारण लाइन दयेकेगु प्रस्ताव याःगु खः । खुसि बेसिनया आधारय् झिंस्वंगू ४०० केभी प्रसारण लाइन दयेकी । रक्सौलनिसें–केरुङ तकया प्रसारण प्रणाली व कुशाहा कटैयापाखें सुरु जुइगु प्रसारण ल ाइनयात किमाथाङका तक स्वानाः त्रिदेशीय दयेकेगु लक्ष्य तयातःगु दु ।

नेपाल विद्युत प्राधिकरणया कार्यकारी निर्देशक कुलमान घिसिङया कथं जुलविद्युत आयोजनाया निर्माण लिसें प्रसारण प्रणाली दयेकेगु निंतिं विशेषः बः बिया वयाच्वंगु दु । वय्कलं थौंकन्हय् दयेकाच्वंगु पूर्वपश्चिम प्रसारण प्रणालीया ज्या क्वचायेकाः न्हूगु प्रणालीया ज्या सुरु जुइगु खँ धयादीगु दु ।
अथेहे राष्ट्रिय योजना आयोगं नेपाल, भूटान, भारत व बंगलादे शस्वाइगु (बिबिआरएन) प्रसारण ल ाइन दयेकेगु निंति पहल याःगु दु । आयोगया पुलांम्ह दुजः डा. अरविन्दकुमार मिश्रं बिबिआइएनदुने प्रसारण प्रणाली जडानया लागि अध्ययन जुयाच्वंगु खँ धयादीगु दु ।

नेपालय् उत्पादन जुइगु मत भारत जुयाः पाकिस्तान व बगलादेश तक यंकेफइगु खँ धाःगु दु । नेपाःया जलविद्युत आयोजनाय् बंगलादेशं नं लगानी यायेत थःपिं तयार दु धायेधुंकूगु दु । प्रशारण प्रणाली दयेकेगुली बांलाक ध्यान बिल धाःसा किर्गिस्तान, ताजकिस्तान, अफगानिस्तान, पाकिस्तान इरानयात छगू हे प्रणालीइ स्वयोफइ । अथेहे नेपाः, भूटान, बंगलोदश व भारतलिसे नं प्रसारणा लाइन स्वायेफइ । अझ चीनयात तकं थ्व हे प्रसारण लाइन दुने स्वायेफइगु प्राधिकिरणया विश्वास दु ।