ने. सं. ११४३ तछलाथ्व त्रयोदशी -

बुद्ध एयरया कोलकता उडान बन्द जुइगु

येँ – बुद्ध एयरं कोलकाता उडान बन्द याइगु जूगु दु । बुद्धं वइगु डिसेम्बर २ तारिख लिपा कोलकता उडान बन्द यायेत्यंगु खः । कोलकता उडानय् घाटा जुइवं बुद्ध एयर थुगु रुटय् विमान मब्वयेकेगु निर्णयय् थ्यंगु खः । थ्व रुटय् जक बुद्धं झिगू करोड द्यापं फयेधुंकूगु दु ।
कोलकताय् नेपाःया पर्यटनबारे प्रचार प्रसार तसकं म्हो जूगुलिं जहाजया सिटय् मजाइगु जुइवं बुद्धं द्यापं फयेमाःगु खः ।

बुद्ध एयर थःपिंसं आशा याना तयाकथं कोलकताय् नेपाः बारे प्रचार प्रसार मजुयाच्वंगु व उकिं यानाः हे बजाः कायेमफुगु खँ पित हःगु दु । बुद्धं वंगु जेठ महिना निसें जक एटीआर ७२–५०० पाखें येँ– कोलकता उडान सुरु याःगु खः । बुद्धं थ्वयां न्ह्यव येँ–बनारस नं उडान याःगु खः । बनारस उडान धाःसा न्ह्याना हे च्वनीगु जूगु दु ।

बनारसया उडान बांलाःगुलिं बुद्धं कोलकता लिपा गुवाहाटी नं उडान यायेगु तयारी यानाच्वंगु खः । आः कोलकताय् हे द्यापं फयेमाःगुलिं गुहावटी उडान नं मजुइगु सम्भावना ब्वलंगु दु । कोलकता रुट असफल जुइवं आः बुद्धं थःपिनि पूवंक ध्यान नेपाःया हे आन्तरिक उडानय् बीगु जूगु दु । थ्व झ्वलय् विकट थासय् नं नियमित उडान सुरु यायेगु योजना दयेकूगु दु ।

थुकिया निंतिं कम्पनीं मेगु विमान थप यायेत विमान कम्पनीत भाइकिङ व सेस्नालिसे विमान न्यायेगु बारे खँ न्ह्याकेधुंकूगु दु । बुद्धं थुपिं निगू मध्ये थःत उपयुक्त जूगु कम्पनी पाखें सन् २०२० दुने स्वंगः व सन् २०२१ दुने निगः विमान थप न्यानाः आन्तरिक रुटय् हे थप उडान यायेगु योजना दयेकातःगु दु ।

थौंकन्हय् कम्पनीया तःग्वःगु चिग्वःगु यानाः झिंस्वःगु विमान संचालनय् दुसा थुगु विमानं पोखरा, विराटनगर, धनगढी, भद्रपुर, भरतपुर, जनकपुर, सुर्खेत, सिमरा, तुम्लिङटार व भैरहवाय् विमान ब्वयेकाच्वंगु दु ।