भगवान शिवया रहस्य

देवाधिदेव महादेवया नामं बय्बय् जुयाच्वंम्ह शिव पंचायनय् भगवान सूर्य, गणेद्यः, देवी, रुद्र अले विष्णु भगवान लाः । अथे हे शिवया द्वारपालय् नन्दी, स्कन्द, वृषभ, भृंगी, गणेश, उमामहेश्वर व महांकाल दुथ्याः । गथे जय व विजय विष्णु भगवानया पार्षद खः अथे हे बाण, रावण, चण्ड, नन्दी भृंगी आदि शिवया पार्षद खः ।

दक्व धर्मया केन्द्रया रुपय् शिवयात हे कयातःगु दु । शिवया भेषभूषा हे थज्याःगु कि प्रत्येक धर्मया मनूतय्सं भगवान शिवय् थःगु प्रतीक मालेफु । शिवया शिष्यतय् दथुइ थज्याःगु छगू परम्पराया शुरुवात जुल कि गुगु लिपा वनाः शैव, सिद्र, नाथ, दिगम्बर व सूफी सम्प्रदायय् विभक्त जू वन । नांजाःम्ह विद्वान प्रोफेसर उपासकं ला थुलितक मान्यता बियातःगु दु कि शिवं बुद्धया रुपय् जन्म काःगु खः ।

वय्कलं पाली ग्रन्थय् वर्णन यानातःगु २७ म्ह बुद्धया उल्लेख यानाः धयादीगु दु कि बुद्धया स्वंगू नां अतिकं प्राचीन जू । व खः तणंकर, शणंकर, मेधंकर । द्यः व दैत्यत निखलंया प्रियम्ह भगवान शिवयात द्यःतय् नापं असुर, दानव, राक्षस, पिशाच, गन्धर्व, यक्ष आदि सकसिनं पुजा याइ । वय्कलं रावणयात नं वरदान बी, अले रामयात नं वरदान बी ।

वय्कलं भष्मासुर, शुक्राचार्य आदि यक्व असुरतय्त वरदान बियातःगु दु । शिव आदिवासी वनवासी जाति, वर्ण, धर्म व समाजया दकलय् तःधंम्ह सर्वोच्च द्यः खः । आदिवासी, वनवासीलिसें सकल साधारण मनूतय्सं ल्वहंया ग्वारायात शिवया चिं माने याः । अथे हे रुद्राक्ष व त्रिशुलयात नं शिवया चिंकथं माने याः।

गुलिसिनं धाःसा डमरु व अर्धचन्द्रयात नं शिवया चिं कथं माने यायेगु याः । तर न्ह्याम्हेसिनं न्ह्यागु हे धाःसां नं सकल भक्तजनतय्सं मने याइम्ह शिवलिंग अर्थात शिवया ज्यातिया पुजा यायेगु याः । हिन्दू धर्मावलम्बितय्गु लागि शिवलिंगया विशेष महत्व दु । शिवलिंग धयागु महाद्यःया प्रतीक खः । धर्मशास्त्रकथं लिंग धयागु शक्ति खः ।

अथे जुयाः उत्पादक शक्तिया चिंया रुपय् लिंगया पुजा यायेगु याइ । लिंगया पुजा यायेवं सकसिगुं पुजा जूवनी धयागु विश्वास यानातःगु दु । शिवलिंगय् योनीयात मातृशक्तिया प्रतीक माने याइ । शिवलिंगं पूरा ब्रम्हाण्ड मिजं व मिसाया उर्जा निर्माण जूगु खः धयागु क्यनाच्वंगु दु । लिंगया पुजा यायेगुया छुं कारणतमध्ये छगू थज्याःगु नं दु ।

शिवलिंगया मान्यताकथं लिंग छगू विशाल लौकिक अण्डाशय खः । गुकिया पूरा अर्थ ब्रम्हाण्डया प्रतीक खः ।शिवलिंग व त्रिमूर्ति–त्रिभुतिया मतलब खः ब्रम्हा, विष्णु व महेश । थुकियात अझ बांलाक सीकेगु खःसा थुपिं स्वम्हं सत्य, ज्ञान व अनन्तयात संकेत यानाच्वंगु दु । शिवलिंगया बारे ब्रम्हा व विष्णुया दथुइ विवाद जुयाच्वनीगु ।

छक्वः ब्रम्हां थः हे सृष्टिकर्ता जूगुलिं श्रेष्ठ जूगु दावी यात । अले विष्णुं नं थः सृष्टिया पालनकर्ता जूगुलिं थः हे श्रेष्ठ जूगु दावी यात । थथे ब्रम्हा व विष्णु दथुइ विवाद जुया च्वंबलय् अन छगू विशाल शिवलिंग प्रकट जुल । निम्ह द्यःतय् दथुइ सहमति जुयाः थ्व निश्चय याइ कि सुनां थ्व शिवलिंगया च्वः प्वः पत्ता लगे याये फइ व हे श्रेष्ठ सावित जुइ ।

ब्रम्हा व विष्णु निम्हं शिवलिंगया च्वः प्वः मालेत छम्ह दकलय् च्वय् व मेम्ह दकलय् क्वय् वनी । तर इपिं शिवलिंगया च्वः व प्वः मालेत ताः लाइमखु । थुकिं इमित थ्व ज्ञान दइ कि शिवलिंग हे अनन्तकाल खः । शिवलिंगया उत्पत्तिइ गुगुं नं रंग दइमखु । थ्व गुगु रंगया सम्पर्कय् वइ व हे रंगया जुइ । शिवलिंगया पूजा ध्यान साधनाया निंतिं खः । शिवलिंगयात निर्गुण ब्रम्हा नं धाइ ।

कल्याण मित्र