थौं नेवाः बौद्धतय् पञ्चदान पर्व
येँ – नेवाः बौद्धतय्सं न्याये का वयाच्वंगु पञ्चदान पर्व थौं तःजिक हनाच्वंगु दु । थौं थीथी बहाःबही लिसें थीथी बौद्ध धार्मिक लागाय् पञ्चदान कायेगु व बीगु ज्या जुयाच्वंगु दु ।थौं येँ व ख्वपय् पञ्चदान जूगु खः । यलय् धाःसा मेगु हे न्हि कुन्हु पञ्चदान माने याइ ।
येँय् मंकाः कथं पञ्चदान माने यायेगु झ्वलय् सामूहिक पञ्चदान कार्यक्रम मूल समितिया ग्वसालय् ठमेलया भगवान बहालं सुथय् ८ बजे पञ्चदान शुरु जुइगु ज्याझ्वः दयेकातःगु दु । थ्व सामूहिक पञ्चदान ब्रम्हत्वाःया मुसुंबहालय् थ्यंकाः समापन जुइ ।
अथे हे गुथि संस्थानं व्यापारिक भवन दयेकेत्यंगु असं क्वथुननिया अशोक वृक्ष विहारय् नं थौं सुथंनिसें पञ्चदान याइगु जूगु दु। विहारया गुथियारपाखें परम्परांनिसें न्ह्याका वयाच्वंगु पञ्चदान यायेत्यंगु खः । लिसें न्हिनसिया १२ बजे निसें १ बजे तक भिक्षु निग्रोधपाखें धर्म देशना याइगु ज्याझ्वः नं दु। विहारयात व्यापारिक भवन दयेकेत्यंगु धासें स्थानीय जनतां विरोध याना वयाच्वंगु दु।
LEAVE YOUR COMMENTS