यँयाःया साइत पिहां वल

येँ (नेपालभाषा टाइम्स)/गुंला सिधयेवं सुरु जुइगु यँयाःलिसे सम्बन्धित थीथी ज्याझ्वःया साइत पिहां वःगु दु । नेपाल पञ्चांग निर्णायक विकास समितिपाखें थ्व साइत तयार याःगु खः ।
समितिं सार्वजनिक याःगु ज्याझ्वः कथं यःसिं थनेगु लागिं नालाय् सिँ काः वनेगु साइत यंलाथ्व दुतिया (भदौ ९ गते) सोमवाः कुन्हु सुथय् ९ः४६ बजे पिहां वःगु दु । वकुन्हु सुथय् केन्द्रीय मानन्धर संघया दुजः व नेपाली सेनाया जवानत हनुमानध्वाखाय् साइत यानाः वन यात्राय् वनी । यःसिं थनेगु सिँ नालाया जंगलय् काः वनीगु खः । वकुन्हु हे बहनी ९ः३ बजे सिमा पालेगु ज्या जुइ । अन सिमा पाले न्ह्यः सिमाय् दुगुचा बलि बियाः पुजा याइ ।
अन सिमा पालाः तयार याःगु यःसिंयात लँधुछि साला हयाः येँया भोताहितिइ थ्यंके हइ । भोताहितिइ तयातःगु उगु यःसिंयात काया अष्टमि (भदौ १५ गते) आइतवाः कुन्हु सुथय् ९ः५२ बजे गुर्जुया पल्टन समेत तयाः नगर प्रवेश याकाः हनुमानध्वाखाय् थ्यंके हइ ।
हनुमानध्वाखाय् यंलाथ्व द्वादशी (भदौ १९ गते) विहीवाः सुथय् १०ः३१ बजेया साइतय् यःसिं थनी । यःसिं थनेगु ज्या केन्द्रीय मानन्धर संघया नेतृत्वय् जुइगु खः । हनुमानध्वाखाय् यःसिं थनेवं यँयाः शुरु जूगु माने याइ । वकुन्हु हे बहनी लँय् मत ततं उपाकु वनेगु ज्या जुइ ।
यँयाःया ज्याझ्वः कथं यंलाथ्व चतुर्दशी भदौ २१ गते) शनिवाः क्वःने कुमारीया रथ साली । थ्वकुन्हुयात इन्द्रजात्रा धयातःगु दु । वयां कन्हय् पुन्हि (भदौ २२ गते) आइतवाः कुमारीया रथ थःने लागाय् साली । थ्वकुन्हु समय् इनेगु याइ । यंलागा त्रियोदशी (भदौ २६ गते) नानिचायाः न्यायेकी । नानिचायाः क्वचायेव राष्ट्रपति कुमारी छेँय् वयाः श्री कुमारी, श्री गणेश व श्री भैरवया ल्हातिं सिन्हः तिनादी ।
वकुन्हु हे बहनी १०ः३२ बजेया साइतय् यःसिं क्वःथली । क्वःथःगु यःसिंयात पचली भैरवय् यंकाः विसर्जन याइ । यःसिं क्वःथलेवं यँयाः नं क्वचाइ ।