म्यानमारय् सैन्य कु, सु चीसहित प्रमुख नेतातय्त ज्वन

एजेन्सी- म्यानमारया सेनां नेतृ आङ सान सुची लिसें सत्तारुढ दलया वरिष्ठ नेतातय्त ज्वनाः सैन्य कू याःगु दु । सेनां दछिया निंतिं संकटकालया घोषणा नं याःगु दु ।

वंगु आम निर्वाचनयात कयाः सरकार व सेना दथुइ विवाद जुयाच्वंगु झ्वलय् सेनां नागरिक सरकारयात कु यानाः सैन्य प्रमुख मिन आङ लाइङयात सत्ताय् वःगु दु।

नेतृ आङ सान सु चीयात ज्वंगु छुं ई लिपा हे सेनां टेलिभिजन मार्फत सुचीयात ज्वनागु पुष्टि यासें दछिया निंतिं संकटकाल लागू यानागु घोषणा याःगु खः । सैन्य कु लिपा आः म्यानमारया फुक्क धयाथें सतकय् सेना कुहां वःगु दु ।

मू मू शहरय् इन्टरनेट लिसें टेलिफोन सेवा नं बन्द यानाबिउगु दुसा सरकारी टेलिभिजन एमआर टिभीं प्राविधिक कारणं धासें बन्द यानाबिउगु दु । अथेहे थन विदेशी टेलिभिजन च्यानलत नं बन्द यानाबिउगु दु । राजधानीलसे संचार सम्बन्ध त्वाःथलातःगुलं अनया स्थिति छु दु धयागु जानकारी वयेफयाच्वंगु मदुनि । पुलांगु राजधानी यांगुनय् धाःसा सीमित रुपं फोन व इन्टरनेट चले जुयाच्वंगु दु ।

सैन्य कुया खबर वयेवं यांगुनय् एटिएमपाखें ध्यबा लिकावःपिं हूलमूल जुयाच्वंगु दुसा गुलिखे बैंकतय्सं मेगु सुचं मवःतलेया निंतिं धकाः बन्द यानाबिउगु दु ।

झिदँ न्ह्यतक म्यानमारय् सेनां हे सरकारं चले याना वयाच्वंगु खःसा सुचीया नेतृत्वय् ताःहाकः तक न्ह्याःगु प्रजातान्त्रिक आन्दोलन लिपा न्हूगु संविधान जारी यासें नागरिक सरकार वःगु खः । वंगु नोवेम्भरय् जूगु निक्वःगु चुनावय् सुचीया पार्टी नेशनल लीग फर डेमोक्रेसी (एनएलडी) ८३ प्रतिशत मतसहित बहुमत हयेवं सेनां चुनावय् धाँधली जूगु द्वपं बियाच्वंगु खः । तर निर्वाचन आयोगं धाःसा थुकियात अस्वीकार यायेवं सेनां भ्रष्टाचारीतय्त कारवाही यायेगु ख्याच्वः बिउगु खः । थ्व ख्याच्वः लिपा हाकनं सैन्य कु जुइगु आशंका ब्वलनाच्वंगु खः ।

न्हूगु निर्वाचित जनप्रतिनिधितय् क्वय्या सदनया न्हापांगु बैठक थौं (सोमवाः) च्वनेत्यंगु खः । सेनां थ्व बैठक स्थगित यायेत माग याना वयाच्वंगु खःसां बैठक स्थगित मजूगु अवस्थाय् सेनां सत्तारुढ दलया नेतातय्त ज्वनाः सैन्य कु याःगु खः ।