येँ–रक्सौल रेलमार्ग आः तक गफ हे तिनि

येँ – राजधानी येँदेय् व भारतया रक्सौल स्वाइगु रेल मार्ग आः तक खँय् हे जक लिकुनाच्वंगु सीदुगु दु । येँ–रक्सौल रेल चले यायेगु धकाः न्हापा न्हापाया सरकारतय्सं चर्चा याःगु खःसां आः तक थ्व खँय् हे जक लिकुनाच्वंगु दु ।

दकलय् न्हापां ला आः तक रक्सौल तक रेल चले यायेगु लागिं निगू देश दथुइ सम्झौता तकं जूगु मदुनि । सम्झौता हे मजूनिगु कारणं थ्व रेल मार्ग गय् यानाः दयेकी व थुकी सुनां लगानी याइ धइगु खँ तकं स्पष्ट मजूनि ।

भारतं थ्व रेल मार्ग दयेकेगु लागिं प्रारम्भिक इन्जिनीयरिङ अध्ययन छगू धाःसा सन् २०१८ य् याःगु खः । तर थ्व रेल मार्ग छु छु थाय् जुयाः न्ह्याइ धइगु खँ धाःसा अझं निर्धारण याःगु मदुनि । रेल मार्गया ‘फाइनल लोकेसन निर्धारण यायेगु लागिं सर्वेक्षण हे याये मानिगु खँ धाःगु दु ।

थ्व रेलमार्ग १३५ किलोमिटर ताःहाकः जुइ धइगु अनुमान यानातःगु दु । तर थ्व धाथें थुलि हे ताःहाकः जुइ धइगु खँ नं आः तक सीदुनि । थुकिया लागिं नं अध्ययन हे याये मानिगु अवस्था दनि । तर थ्व अध्ययनया खर्च सुनां याइ धइगु खँ धाःसा आः तकं स्पष्ट मयाःनि । थुकिया लागिं नं भारतीय पक्षलिसे वार्ता हे याये मानिगु खँ नं धाःगु दु । अथे हे थ्व रेलमार्ग दयेकीबलय् थुकिया व्यवस्थापन सुनां याइ धइगु खँ नं स्पष्ट मजूनि । यदि थुकी नेपालं नं लगानी याये मालीगु अवस्था जुल धाःसा थ्व लगानीया लागिं भारतयाके हे त्यासा कायेगु लाकि मेगु देशयाके त्यासा कायेगु धइगु नं आः तक स्पष्ट मजूनि धाःगु खँ नं सीदुगु दु ।

नेपाःया आपालं सामान भारतया रक्सौल जुयाः वइगु व उगु सामानत नं अप्वः यानाः येँय् हे वइगु जूगुलिं थ्व रेलमार्ग देयेकेबलय् सामान समेत हये फइग्ु यानाः दयेके माली धकाः नं खँ पिहां वयाच्वंगु दु ।

सम्बन्धित बुखँ

LEAVE YOUR COMMENTS