ट्रान्स जेण्डर मान्यता मदयाः ब्वनेगु त्वःफित

येँ – थःत ट्रान्स जेन्डर (पारालिंगी) धकाः परिचय बियादीम्ह रुक्साना कपालीं त्रिभुवन विश्वविद्यालयं थःगु नां रजिष्ट्रेशन मयाःगुलिं ब्वनेगु हे स्थगित यानादीगु दु । भाषा विज्ञान विषय कयाः स्नातक ब्वनेत त्रिविया फारम भरे यानागु खःसां त्रिविं मौखिक रुपं जिउ धाःसां थःगु नां धाःसा रजिष्ट्रेशन मयाःगुलिं ब्वनेगु त्वःतेमाःगु खँ वय्कलं ‘नेपालभाषा टाइम्स’ यात कनादिल ।

त्रिविया रजिष्टर यायेगु निंतिं थम्हं फारम भरे यानागु खःसां नं कम्प्युटरय् ट्रान्स जेन्डर धइगु मदुगुलिं भर्ना जुइ मफुगु खँ कँसें ब्वने चाहे जुयाः नं ब्वने मफुगु दुःख नं वय्कलं प्वंकादिल । थम्हं वडा कार्यालयनिसें थीथी थासय् थःत ट्रान्स जेन्डर धकाः सर्टिफिकेट कया हयेधुंकाः नं त्रिविं उकियात मान्यता मबिउगु खँ कँसें उकियात कयाः थः आः अदालत वनेगु सोच दयेकाच्वनागु खँ नं वय्कलं कनादिल ।

छुं न्हि लिपा थः विदेश वनेत्यनागु जुयाः विदेशं वयेधुंकाः मुद्दा तयेगु तयारी जुयाच्वंगु खँ नं वय्कलं कनादिल । विदेशय् वनेगु निंतिं समस्या जुइ मखुला धइगु न्ह्यसःया लिसलय् वय्कलं समस्या दुसां नं भिसा वइगु सम्भावना धाःसा दु धासें तर यात्राया झ्वलय् नं ट्रान्स जेन्डरयात स्वइगु दृष्टिकोण धाःसा पाःगु खँ कनादिल ।

वय्कलं त्रिविनिसें राष्ट्रिय परीक्षा बोर्डय् तकं थम्हं नां भिंकेगु निंतिं निवेदन तयागु खःसां नां भिंके मिले मजू धकाः लित छ्वया हःगु धासें लिखित रुपं धाःसा गुुगुं नं निकायं छुं नं कथंया भ्वं मबिउगु खँ नं कनादिल । नेपाःया सरकारी ज्याकुथी मिसा, मिजं व तेस्रो लिंगी धकाः जक तयातःगु धासें तेस्रो लिंगी नं थीथी कथंया दुगुलिं तेस्रो लिंगी जक धायेगु पाय्छि मजूगु वय्कःया तर्क दु ।