चाबही–सक्व लँ मदयेकू धासें हानं प्रदर्शन

येँ – चाबही–सक्व सतक खण्ड अन्तर्गतया थलि–सक्व लँ तत्काल स्तरोन्नति यायेगु सहमति जूगु दु । चाबही जुयाः सक्व वनीगु सतक मदयेकू धासें स्थानीय वासिन्दां म्हिगः सुथंनिसें सतक पना बीवं कागेश्वरी मनोहरा नगरपालिकास्थित थलि नगरपालिकालिसे विद्यार्थी व स्थानीय वासिन्दाया दथुइ सहमति जुइवं आन्दोलन लित काःगु खः ।

स्थानीय वासिन्दां इलय् सतक मदयेकूगुलिं अनिश्चितकालीन बन्दया आह्वान यानाः प्रदर्शनय् कुहां वःगु खः । सतक दयेकेगु ज्या न्ह्याःगु प्यदँ दयेधुंकाः नं सतक दयेकेगु ज्या क्वमचाःगु धासें स्थानीय जनतां सतकय् टायर च्याकाः प्रदर्शन याःगु खः । प्रदर्शनया झ्वलय् सतक दयेकेगु ठेक्का काःम्ह ठेकेदारयात कारबाही यायेमाःगु माग नं याःगु खः ।

स्थानीय वासिन्दाया आन्दोलन लिपा जूगु सहलहय् संघर्ष समिति व नगरपालिका दथुइ स्वंगू बुँदाया सहमति जूगु दु । उकी तत्काल लँय् दुगु ध्याचः मुनेगु, छवाःया दुने लँया गेडिङ यायेगु व सतक दयेकेत सम्बन्धित निकायय् पहल यायेगु खँ दुथ्याः ।

थ्व स्वयां न्ह्यः बौद्ध जोरपाटीया स्थानीय जनतां याकनं सतक पीच यायेमाः धकाः प्रदर्शन याःगु खःसा छुं भचा पीच यायेधुंकाः ठेकदार कम्पनी हाकनं ज्या दिकूगु खः । चाबहीनिसें सक्व तकया ११.४६ किलोमिटर सतक खण्डय् प्यंगू कम्पनी इलय् ज्या क्वमचायेकूगुलिं यानाः उगु सतक जुयाः वनीपिं लँजुवाःतय्त समस्या जुयाच्वंगु दु ।

सम्बन्धित बुखँ

LEAVE YOUR COMMENTS