नौबिसे–मुग्लिन सतकखण्ड स्तरोन्नतिया तयारी

येँ – स्वनिगलय् दुहां वयेगु व स्वनिगलं पिहां वनेगु प्रमुख मार्गया रुपय् दुगु नौबिसे–मुग्लिन सतकखण्ड नं स्तरोन्नति याइगु जू दु । थौंकन्हय् नारायणगढ–मुग्लिन सतकखण्ड स्तरोन्नतिया ज्या करिब अन्तिम चरणय् थ्यनेधुंकूगु दु । नौबिसे–मुग्लिन सतकखण्ड स्तरोन्नतिलिसें आः थुगु सतकखण्डया नं स्तरोन्नति यायेत्यंगु खः ।

करिब ९६ किलोमिटर ताःहाकःगु सतकखण्डया स्तरोन्नति यायेगु नापनापं नौबिसेनिसें मुग्लिन तकया त्रिशुली खुसि पारीइ नं सतक निर्माणया ज्या न्ह्याकीगु जूगु दु । त्रिशुली खुसिया पारिपाखे धाःसा आः सतक दुगु क्षेत्रया पारिइ २८ किलोमिटर सतक निर्माण यायेगु सडक विभागया वैदेशिक महाशाखा प्रमुख संजयकुमार श्रेष्ठं कनादिल ।

सतकखण्डया स्तरोन्नतिया निंतिं विस्तृत अध्ययन जुयाः आः अर्थ मन्त्रालयपाखें बजेटया निंतिं विश्व बैंकय् तकं छ्वयेधुंगु श्रेष्ठं कनादिल । सतकखण्डया विस्तृत अध्ययन नं बैंकया हे प्राविधिक पुचलं याःगु खः ।

सतक स्तरोन्नतिया निंतिं विश्व बैंक सकारात्मक दुगु व सम्भवत न्हय्ला च्यालाया दुने सतक निर्माणया निंतिं बजेट क्वःछीगु ज्या जुइगु अनुमान यानातःगु दु । प्रारम्भिक अध्ययन कथं सतक स्तरोन्नतिया निंतिं २३ गू अर्ब लगे जुइगु अनुमान यानातःगु दुसा ज्या शुरु जूगु स्वदँत्याया दुने क्वचायेकगु कथं ज्या न्ह्याकेगु तयारी जुयाच्वंगु दु ।