नेपालभाषा एकेदमिया दँमुँज्या

किपू – नेपालभाषा एकेदेमिया १८ क्वःगु दँमुँज्याः म्हिगः क्वचाल । एकेदेमिया संरक्षक वाङमय शताब्दी पुरुष सत्यमोहन जोशी मूपाहां कथं झाःगु उगु दँमुँज्या एकेदेमिया चान्सलर चित्तरन्जन नेपालीया सभापतित्वय् जूगु खः । ज्याझ्वलय् सदस्य सचिव मल्ल के. सुन्दरं दच्छिया प्रगति विवरण न्ह्यब्वयादीगु खःसा दांभरी पुष्पराज राजकर्णिकारं आर्थिक प्रतिवेदन न्ह्यब्वयादीगु खः ।

दँमुँज्याय् जनकवि दुर्गालाल श्रेष्ठ, बाखंच्वमि हितकरवीर सिंह कसाः, भाषासेवी लक्ष्मीदास मानन्धर, डा. सुमनकमल तुलाधर व मूपाहां सत्यमोहन जोशीपिंसं नुगःखँ तयादीगु खः।

दँमुँज्यां एकेदेमिया पार्षदय् साहित्यकार निर्मलमान तुलाधर, कलाकार नारायणदेवी प्रधान, कवि शाक्य सुरेन, पत्रकार सुरेश किरण मानन्धर, चित्रकार एकाराम सिं व साहित्यकार पूर्ण मुनकःमिपिंत दुजः कथं ल्यःगु दुसाः माइक्रोशफ्ट विज्ञ एलन बैलोचन तुलाधरयात आमन्त्रित पार्षद् कथं ल्यःगु दु ।

नेपालभाषा एकेडेमिपाखें वंगु वालय् तिनि नेपालभाषाया सफू प्रवद्र्धन यायेगु ताः तयाः स्वन्हुयंकं न्ह्याइगु सफू ब्वज्या याःगु खः । एकेडेमिं नेपालभाषाया सफू प्रकाशनया लिसें थःगु हे जर्नल ‘नेवाः प्रज्ञा’ नं नियमित प्रकाशन यानाच्वंगु दु ।