ने. सं. ११४३ तछलाथ्व दशमी -

बाजंगुरुतय्त सम्मान व ज्यापु दिवसया पाःब्वः लःल्हात

येँ – गुरुपुन्हिया लसताय् ज्यापु संस्कृति विकास कोषं येँया परम्परागत खुइस्वंगू त्वाःया बाजं गुरुपिंत हंगु दु । येँ महानगरपालिकाया मेयर बालेन्द्र साह मू पाहाँ कथं वःगु ज्याझ्वलय् गुरुपिंत हाकु तपुलिं पुइकाः ख्येँ सगं बियाः हंगु खः । अथेहे ज्याझ्वलय् खुइस्वंगुलिं त्वाःयात बाजं न्यायेगु निंतिं म्हतिं झिद्वः झिद्वः तकाया चेक नं लःल्हाःगु खः । ज्याझ्वलय् स्थानीय चुनावय् येँ महानगरपालिकाय् त्यानावःपिं ज्यापु जनप्रतिनिधिपिंत नं हनेज्या याःगु खः ।

ज्याझ्वलय् झिंगुक्वःगु ज्यापु दिवसया पाःब्व नं लःल्हाःगु खः । वइगु यःमरि पुन्हिकुन्हु हनीगु झिंगुक्वःगु ज्यापु दिवसया पाःब्व गोफः त्वाः नाय्भाचोयात लःल्हाःगु खः । कोषया नायः मंगलकृष्ण श्रेष्ठ व झिंच्याक्वःगु ज्यापु दिबसया संयोजक गोफःत्वाः माकःगल्लीया नायः गोविन्द महर्जनं पाःकाःगु त्वाःया नायः पञ्चनारायण महर्जनयात पाःब्वया दसिपौ व छगू लाख तका लःल्हाःगु खः ।

ज्याझ्वलय् न्ववासें येँ महानगरपालिकाया मेयर साहं थः महानगरया मेयर जुया वयेधुंकाः थनया फुक्क संस्कृतियात नाला कयागु धासें आः थः नं बालेन्द्र साह महर्जन जुल धाःगु खः । कोषया न्वकु सान्त महर्जनं लसकुस याःगु ज्याझ्वलय् कोषया नायः महर्जनं येँ महानगरपालिकां थुगुसीया बजेटय् कोषया छेँ दनेगु निंतिं छगूत्या करोड दां विनियोजन यानाबिउगु जानकारी बिसें महानगरपालिकायात सुभाय् बिउगु खः । ज्याझ्वलय् ज्यापु महागुथि केन्द्रीय समितिया नायः राजभाई जकःमि, विकास कोषया संस्थापक प्रचण्डमान वज्राचार्य, झिंच्याक्वःगु ज्यापु दिवसया संयोजक गोविन्द महर्जनपिंसं भिंतुना न्वचु बिउगु खः ।