आरक्षण पक्षधरत ज्वना यंकल

कन्हय् व कंस वालुवाटारय् नं धर्ना व घेराउ

येँ – आरक्षण बचाऔं आन्दोलनकारीतय्त प्रहरीं नियन्त्रणय् काःगु दु । भद्रकालीइ शान्तिपूर्ण रुपं घेराउ ज्याझ्वः यानाच्वंपिं आन्दोलनकारीतय्त प्रहरीं हस्तक्षेप यानाः झिंप्यम्हेसित नियन्त्रणय् काःगु खः । ज्वंपिंत महेन्द्र पुलिस क्लबय् तये यंकूगु खःसा उमित त्वःतेमाः धकाः माग यासें जुलुस पिकाःपिं न्याम्हेसित नं ज्वनाः अन हे कुना बिउगु दु ।

प्रहरीं नेपाल आदिवासी जनजाति महासंघया कार्यवाहक अध्यक्ष गोविन्द छन्त्याल, दलित गैर सरकारी महासंघया अध्यक्ष भक्त विश्वकर्मा, संघीय लोकतान्त्रिक राष्ट्रिय मञ्चया अध्यक्ष कुमार लिङदेनयात ज्वंगु खः ।

अथे हे खगेन्द्र माखिम, दलमर्दन कामी, सुखवीर थामी, सहेक विश्वकर्मा, हेमन्त राई, काशीन्द्र यादव, राकेश राई, सीएन थारु, कल्पना सुनारस, उस्पार सुनार, थाङसाङ लावती, वाङजु तामाङ, जयनकुमार मोक्तान, रमेश थापा मगर, लक्ष्मी थापा व रमेश अधिकारीयात नं ज्वंगु दु। ज्वंपिंत म्हिगः हे बहनी ६ बजे त्वःतेधुंकूगु दु ।

उमित त्वःतेगु झ्वलय् प्रहरीं थीथी कथंया शर्त तःगु खँ कँसें कावा उपाध्यक्ष छन्त्यालं शर्त तयाः थःपिंत त्वःतेगु खःसा पिहां मवनेगु अडान कायेवं अथें त्वःता हःगु खँ धाःगु दु ।वय्कलं निगू तिहाईया सरकारं शान्तिपूर्ण धर्ना तकं च्वंके मबिउगु धासें वर्तमान सरकारया ज्या पञ्चायत कालीन स्वयां नं ग्यानापूगु द्वपं नं बियादीगु दु ।

आदिवासी जनजातिया लिसें लिउने लानाच्वंगु थीथी पुचलं थःपिंत संविधानं बिउगु अधिकार ग्यारेन्टी यायेमाःगु माग यासें धर्ना बियागु खँ नं छन्त्यालं कनादिल । थौंया ज्याझ्वः लिपा आः थ्वहे वइगु २८ व २९ गते प्रधानमन्त्री निवास बालुवाटारय् धर्ना बीगु ज्याझ्वः तयातःगु दु । अथे हे देय्न्यंकंया प्रदेश सरकार व स्थानीय सरकारी ज्याकुथी नं धर्ना बीगु खँ धाःगु दु । मेखे प्रहरी दमनयात लार्हुनीपं म्हिगः प्रेस विज्ञप्ति पिथनाः विरोध याःगु दु ।

सम्बन्धित बुखँ

LEAVE YOUR COMMENTS