एमसीसी लिपा अमेरिकी सेना

येँ -तसकं विवादय् लानाः अमेरिकी सहयोग सम्बन्धी एमसीसी सम्झौता नेपालं अनुमोदन याःगुयां छुं ई लिपा हे म्हिगः अमेरिकी सेनाया छम्ह प्रमुख नेपाः थ्यंकः वःगु दु । अमेरिकी सेनाया एशिया–प्रशान्त क्षेत्र प्रमुख चाल्र्स ए फ्लिन प्यन्हुयंकंया नेपाः भ्रमणया झ्वलय् म्हिगः येँय् थ्यंकः वःगु खः ।

वय्कः खास यानाः नेपाः–अमेरिका कुटनीतिक स्वापू कायम जूगु ७५ दँ क्यंगु लसताय् लाकाः नेपाः झाःगु खःसां नेपाःया कुटनीतिक ख्यलं धाःसा वय्कःया थ्व भ्रमणयात एमसीसी सम्झौतालिसे स्वानाः स्वया हःगु दु ।

एमसीसी सम्झौता लिपा नेपाः व अमेरिकाया स्वापू अझ क्वातुया वंगु व उकियात आः सैन्य तह थ्यंक विस्तार याना यंकेगु ग्वसाः कथं अमेरिकी सेना अधिकारीया भ्रमण जुयाच्वंगु खँ धया हःगु दु ।

नेपाःयात एमसीसी सम्झौता याकाः अमेरिकी सैन्य क्याम्प इण्डो प्यासिफिक दुने यंकेगु रणनीति अमेरिकां म्हितूगु धकाः द्वपं वयाच्वंगु खःसा थ्व भ्रमणं उकियात पुष्टि यायेत तिबः बीगु खँ नं नेपाःया कुटनीतिक विज्ञतय्सं धयाहःगु दु ।

विज्ञतय्सं नेपालं सैन्यस्तरय् थ्यंक विस्तार जुइगु स्वापू धइगु जःलाखःला देय्लिसे जक तःसा बांलाइगु सुझाव बिसें न्हय्गू समुद्र पारीया देय्लिसे अज्याःगु स्वापू विस्तार याना यंकल धाःसा नेपालय् नं युक्रेन थेंज्याःगु संकट ब्वलनेफुग खँ धयाहःगु दु ।

नेपाः थ्यंकः वःम्ह अमेरिकी अधिकारी फ्लिनं नेपालय् राष्ट्रपति, प्रधानमन्त्री लिसें थीथी मनूत नापलाइगु ज्याझ्वः दु । थ्व झ्वलय् वय्कलं नेपाःया हिमाली लागाया नं भ्रमण यानादी ।

नेपाः वये न्ह्यः वय्कः भारत नं झाःगु खः । भारतय् थीथी अधिकारीत नापलानाः वय्कः नेपाः झाःगु खः । अमेरिकाया इण्डो प्यासिफिक सैन्य डिजाइन दुने भारत नं छगू महत्वपूर्ण अंगया रुपय् दुथ्यानाच्वंगु दु । थुकियात चीनं धाःसा ययेका मच्वंगु खँ नं धायेगु यानाच्वंगु दु ।

प्रम देउवा अमेरिका वनीगु
अमेरिकी सेना अधिकारीया नेपाः भ्रमण धुनेवं हे नेपाःया प्रधानमन्त्री शेरबहादुर देउवां अमेरिका भ्रमण यानादीगु जूगु दु । वय्कः लिसें तुं नेपाली सेनाया प्रधानसेनापति प्रभुराम शर्मा नं अमेरिका भ्रमणय् झायादी ।

विशिष्ट सूत्रं धाः कथं प्रम देउवाया अमेरिका भ्रमण थ्वहे इलय् जुइगु धकाः तय जुयाच्वंगु खः । अमेरिकी सेनाया अधिकारी नेपाः वइगु जुयाः हे प्रम देउवाया अमेरिका भ्रमण नं लिछ्याःगु खः । प्रम देउवां थःगु अमेरिका भ्रमण हे लिछ्याये मायेक जूगु अमेरिकी सैन्य अधिकारीया थ्व नेपाः भ्रमणयात थ्व कारणं यानाः नं तसकं महत्व बियाः स्वयाच्वंगु खँ धाःगु दु । अमेरिकी सेनाया नेपाः भ्रमण क्वचायेवं हे नेपाःया सेना प्रमुखं नं अमेरिका भ्रमण याइगु नं क्वःछिनातःगु दु ।

नेपालभाषा टाइम्स

च्वमिया मेमेगु

• पहिचानवादी आन्दोलनय् गोलीप्रहार
• विश्वया न्हयाथाय् च्वंसां नेवाःतय्सं थःगु संस्कृतियात म्वाका वयाच्वंगु दु– प्रम दाहाल
• तिलौराकोटयात नं विश्व सम्पदा धलखय् दुथ्याकीगु
• किपुली बुंगद्यःया झ्वाता पलिस्था विवाद ः वार्ता यानाः हे समाधान मालीगु
• ज्वेल्स सहकारीया वृहत् स्वास्थ्य शिविर