‘मांभाय् सःसा मेगु भाय् नं याकनं सइ’

येँ – ‘नेवाःतय्सं थःपिनिगु भाषा व संस्कृति छगू पुस्तां मेगु पुस्तायात लःल्हाल्हां यंकाच्वंगु दु, गुगु कि मेमेगु जातजातिं नं नाला कायेबहःगु खँ खः ।’ थ्व खँ संस्कृति पर्यटन तथा नागरिक उड्डयन मन्त्री रवीन्द्र अधिकारीं थौं विश्व मांभाय् दिवसया सन्दर्भय् म्हिगः नेपाल प्रज्ञा प्रतिष्ठानय् जूगु मातृभाषा सम्बन्धी बिचाः गोष्ठीइ न्ववासें धयादीगु खः ।

गोष्ठीया मूपाहां वय्कलं धयादिल, ‘मांभासं शिक्षा काये खंम्ह मचां मेमेगु भाय् नं अःपुक सयेका काये फइ ।’मेम्ह पाहां भाषा आयोगया नायः डा. लवदेव अवस्थीं प्राथमिक शिक्षा मांभासं कायेखंम्ह विद्यार्थीया मेमेगु भाय् नं बल्लाइगु जूगुलिं मांभासं शिक्षा बीमाःगुली बः बियादिल ।

प्रज्ञा प्रतिष्ठानया सदस्यसचिव जगतप्रसाद उपाध्यायं नेपालय् सछि व नीस्वंगू मातृभाषा सूचीकृत जुयाच्वंगुलिी आः वयाः सछि व नीन्हय्गू भाय् दु धकाः नं चर्चाय् वयाच्वंगु खँ न्ह्यथनादिसें उकी मध्ये छुं छुं भाय् नेपाली भाय्या हे भाषिका जुयाच्वंगुलिं उकिया छानविन जुइमाःगु दु धयादिल ।

प्रज्ञा प्रतिष्ठानया कुलपति गंगाप्रसाद उप्रेतीया सभाध्यक्षताय् न्ह्याःगु उगु गोष्ठीइ प्राज्ञ प्रा.डा. योगेन्द्र प्रसाद यादव, बंगलादेशया राजदूत मास्फी बिन्तेसाम्स्, युनेस्कोया काठमाडौं प्रमुख क्रिष्टियन म्यानहर्ट आदि वक्तापिंसं मांभाय् व मांभाय् दिवसया महत्वयात कयाः चर्चा यानादीगु खः ।

ज्याझ्वःया निगूगु सत्रय् ‘सरकारी ज्याखँय् मांभाय्या छ्यलाबुला’, ‘शिक्षाय् मांभाय्या छ्यलाबुला’, ‘नेपाःया मांभाय्या साहित्यय् मिसा हस्ताक्षर’ यानाः स्वंगू कार्यपत्र न्ह्यब्वःगु खः ।