ने. सं. ११४४ ञलाथ्व नवमी -

बागमति मुहानय् धः ल्वाकछ्यायेगु अझं मदिउनि

स्वनिगःया सभ्यताया रुपय् दयाच्वंगु बागमति सुचुकुचु यायेगु बागमति सफाइ महाअभियान नं २५० औं हप्ताय् थ्यनेत्यंगु दु । आः वइगु शनिवाः महाअभियान २५० औं हप्ताय् थ्यनेत्यंगु दु ।

थनिं करिब न्यादँ न्ह्यः तसकं तामझामपूर्वक बागमति सफाइ महाभियान न्ह्याकूगु खः । उगु इलंनिसें प्रत्येक वाःया शनिवाःपतिकं न्ह्याका वयाच्वंगु थ्व अभियान थौंतक नं जारी हे जुयाच्वंगु दु । महाअभियान लिपा इलय्व्यलय् बागमतिया लः यचुसे च्वंगु क्यनेगु निंतिं सरकारया उच्च पदस्थ अधिकारीतय्सं म्वःल्हुयाः नं क्यंगु खः । अले बागमतिया लः न्हापा थें त्वने जिउकथं लायक यायेगु महाअभियानया उद्देश्य नं खः । सफाइ महाअभियानपाखें आपालं मेट्रिक टन फोहर व्यवस्थापन यायेगु ज्या नं जुया वयाच्वंगु दु ।

तर बागमति सफाइ महाअभियान न्ह्याःगु २५० औं हप्ताय् थ्यनेत्यंगु इलय् खुसिया मुहानय् धः ल्वाकछ्यायेगु क्रम धाःसा आतक नं दिउगु मदुनि । शिवपुरी नागार्जुन राष्ट्रिय निकुञ्जया बाघदुवालं बाः वइगु बागमति गाकर्णेश्वर नगरपालिका–१ य् थ्यनेवं फोहर ल्वाक ज्यायेगु शुरु जुइ । खतुं निकुञ्ज दुने हे नगरपाकिलाया न्यागू बस्ती लानाच्वंगु दुसा थ्व हे बस्तीया लः तप्यंक बागमतिइ वनीगु खः । गुगु क्रम आतकं दिउगु मदुनि । बस्तीया क्वसं स्वनिगलय् वितरण याइगु लःया मुहान नं लानाच्वंगु दु । गुकिं यानाः मुहान फोहर जुयाच्वंगु दु ।

शिवपुरी नगरपालिका वडा नं. १ या वडाअध्यक्ष राम मानन्धरं खुसि व लःया मुहान सफा यानातयेगु खःसा अनच्वंगु बस्ती मेथाय् सारे यायेमाः धयादी । उकिया निंतिं अधिकार सम्पन्न बागमति सभ्यता एकीकृत विकास समितियात तकं इनाप याये धुंगु धयादी । सुन्दरीजलनिसें खुसिया जवंखवं निखेरं फाँटय् सुँगुर व बंगुर लहीगु यानातःगुलिं खुसिइ फोहर ल्वाक ज्यानाच्वंगु दु । तप्यंक खुसिइ यंकाः सुँगुर व बंगुर लहिनातःगु फार्मया फोहर वांछ्वयेत अःपुइगुलिं उकथं फार्म चायेकातःगु दु । तर अज्याःगु फार्म चायेकातःगु व फार्मपाखें वयाच्वंगु फोहर खुसि ल्वाकछ्यायेगु ज्या यानाच्वंगु सर्वसाधारणं स्पष्ट रुपं खंके फुसां अधिकार सम्पन्न धयातःगु बागमति समितिं अनुगमन याये फयाच्वंगु मदु ।

नगरपालिकाया ४ वडाया खुसि सिथय् नं अथे हे फार्म चायेकाः सुँगुर बंगुर लहीगु ज्या जुयाच्वंगु मखसे अज्याःगु फार्मया फोहर नं तप्यंक हे खुसि सिथय् यंकाः वांछ्वेगु ज्या जुयाच्वंगु दु । नगरपालिका ४ या वडाअध्यक्ष श्रीकुमार श्रेष्ठं फोहरया धः तप्यंक खुसि यंकेगु व खुसिया सिथय् नं उकथं फोहर यायेगु गतिविधिया कारणं मुहान क्षेत्रय् हे खुसिया लः हाकुसे च्वनाच्वंगु धयादी ।

‘फोहरया धः ल्वाक छ्यानातःगुलिं हाकुसे च्वंगु थ्व हे खुसिइ लः बाः वनाच्वंगु किपा कयाः अधिकार सम्पन्न बागमति समितियात बियागु खःसां आतकं छुं नं ज्या जूगु मदुनि’ वय्कलं धयादी । समितिया आयोजना प्रमुख आशिष घिमिरें धाःसा कागेश्वरी मनहरा व गोकर्णेश्वर नगरपालिकाया नगरप्रमुखलिसें खुसि सफा यायेगु अभियानय् ग्वाहालि यायेत माग यासें तःक्वः बैठक जुइ धुंकूगु खःसां समन्वय धाःसा जुइ मफगु स्वीकार यानादी ।

थ्व हे झ्वलय् वंगु शनिवाः महाअभियान २४९ औं हप्ताय् पशुपतिया राममन्दिर न्ह्यःने बागमति सफा यायेगु ज्या जुल । उगु सफाइ अभियानया झ्वलय् ९ मेट्रिक टन फोहर व्यवस्थापन याःगु खः । वंगु सिलाचः¥हेकुन्हु आपालं भक्तजनतय् उपस्थितिया कारणं मुनाच्वंगु फोहर व्यवस्थापन यायेगु ज्या जूगु खः । पशुपति लागां जक २ मेट्रिक टन फोहर व्यवस्थापन याःगु खः ।

वि.सं. २०७० साल जेठ ५ गतेनिसें शुरु जूगु बागमति सफाइ महाअभियानं थौंकन्हय् देय्न्यंकं जागरण अभियानया रुपं काःगु दु । जागरणस्वरुप देय्या थीथी पीन्यागू स्वयां अप्वः थासय् खुसि, सहर, बजाः सुचुकुचु यायेगु अभियान न्ह्याकाच्वंगु दु ।