वासः हइपिंत नं पनाच्वन

येँ – सरकारं वंगु खुन्हु न्ह्यवंनिसें घोषणा याःगु लकडाउनया कारणं बजारय् छुं छुं वासः अभाव जूगु दु । मरुया छगू वासः पसः सञ्चालकं थःगु पसलय् छुं छुं वासःया अभाव जूगु खँ कनादीगु दु । थःगु पसलय् वासः मदुगुलिं यानाः वासः सप्लाई यानाच्वंगु डिलरयात माग यानागु खःसां नं प्रहरी लँय् पंगुलिं यानाः वासः मवःगु खँ कनादीगु दु । आपालं थीथी वहाना यानाः पिहां वयाच्वंगुलिं प्रहरी थःथाय् वासः हइम्हेसित छ्वया महःगु खँ नं वय्कलं कनादीगु दु ।

मेखे मरुया हे अट्कोनारायणय् वासः पसल्यां धाःसा आः तक थःगु पसलय् वासःया अभाव मजूगु धासें छुं छुं वासः धाःसा म्हो जूगु खँ कनादीगु दु । वय्कःया कथं वासः हे मदु थ्यंक मजूनि । तर गुलिखें डिलरय् ज्या याइपिं मदुगुलिं यानाः वासः वयेगु क्रम धाःसा म्हो जुयाच्वंगु दु । थःगु पसलय् न्हापा हे माक्वः वासः हयातयागुलिं समस्या मजूगु धासें धयादी, ‘तर लकडाउनया ई ताः हाकः जुयाः वन धाःसा वासःया अभाव जुइफु ।’

वासः पसल्यातय् कथं लकडाउन जुइगु हल्ला जुइवं आपालं नियमित वासः नयेमाःपिंसं थःत माःगु वासः स्टक तयेधुंकूगुलिं तत्काल उकिया लिच्वः मलाःसां लकडाउन ताःहाकः जुल धाःसा समस्या जुइफु ।

ने.सं. ११४० चौलाथ्व ५ (चैत १६)