बलात्कार व मिसा हिंसा विरुद्ध अभियान

येँ – सरकारं अप्वया वनाच्वंगु बलात्कार व मिसा हिंसा नियन्त्रणया निंतिं अभियान न्ह्याकीगु जूगु दु । गृहमन्त्री रामबहादुर थापां मिसा हिंसा बलात्कारया घटना न्यूनीकरणया निंतिं तत्काल विशेष योजना दयेकेत प्रहरीयात निर्देशन बियादीगु खः ।

मन्त्री थापां प्रहरी महानिरीक्षक सर्वेन्द्र खनालयात मन्त्रालयय् सःताः देशय् लिपांगु इलय् मिसा हिंसा व बलात्कारया घटना अप्वया वनाच्वंगु समाचारप्रति थःगु ध्यानाकर्षण जूगु धासें थुकथंया अपराधया घटना नियन्त्रणया निंतिं विशेषकथंया योजना दयेकाः कार्यान्वयनय् हयेत निर्देशन बियादीगु खः ।

थ्व हे झ्वलय् मन्त्रालयं मिसा हिंसा व बलात्कारया घटना अप्वःगुया लिउने लागू वासः सेवन व अय्लाःया विक्रीवितरण जूगु ठहर यासें उकिया विरुद्ध अभियान न्हयाकेत्यंगु दु । ‘लागू वासः निषेध व अय्लाः नियन्त्रण अभियान’ नां बियाः मन्त्रालयं देय्न्यंकं थ्व अभियान न्ह्याकेत्यंगु खः ।

थ्व सम्बन्धय् मन्त्रालयं व्यवस्थित अय्लाः विक्री वितरण व सेवनसम्बन्धी प्रस्ताव मन्त्रिपरिषदय् यंकाः अनं पारित यायेधुंकाः थ्व भदौ मसान्ततकया दुने अभियान संचालन यायेगु तयारी यानाच्वंगु दु ।

सम्बन्धित बुखँ

LEAVE YOUR COMMENTS