ने. सं. ११४४ कौलाथ्व तृतीया -

निदँया दुने धरहरा दयेकेत प्रधानमन्त्रीया निर्देशन

येँ – प्रधानमन्त्री केपी ओलीं म्हिगः धरहरा पुनर्निर्माणया शिलान्यास यानादीगु दु । म्हिगः छगू ज्याझ्वःया दथुइ वय्कलं धरहराया शिलान्यास यानादीगु खः । ज्याझ्वलय् न्ववायेगु झ्वलय् वय्कलं धरहराया पुनर्निर्माण लिपा धरहरा च्वये च्वनाः स्वनिगः स्वयेगु इच्छा प्वंकादीगु दु । लिसें वय्कलं निदँया दुने धरहरा दयेकेगु ज्या क्वचायेकेत ठेकदार कम्पनीयात निर्देशन नं बियादीगु दु ।

ज्याझ्वलय् न्ववायेगु झ्वलय् प्रधानमन्त्री ओलीं धयादी ‘झीसं हाकनं झीगु गौरवपूर्ण धरहरा झीसं स्वयेदइ, येँयात धरहराया च्वये च्वनाः स्वयेदइ ।’ वय्कलं धरहराया पुनर्निर्माण विकासया हे छगू हिस्सा जूगु धासें ऐतिहासिक ज्या न्ह्याःगु खँ वय्कलं कनादिल । न्हापां थम्ह जिं दयेके जिगु धरहरा नारा बियाः पुनर्निर्माण ज्या न्ह्याकूगु खःसां नं उकिं थः सफल मजूगु धासें आः न्हूगु संकल्प कथं थः न्ह्याःवनागु खँ नं वय्कलं कनादिल ।

वय्कलं धयादी, भचा बिस्कं कथं सोचे यानाःगु खः जिं हे दयेके धरहरा, सरकारी खर्चय् नं मखु, जनताया हे खर्चय् । तर उगु अभियान ब्रेक जुल, सोचे यानागु कथं न्ह्याः वनेमफुत ।’म्हिगः जूगु शिलान्याश ज्याझ्वलय् न्ववायेगु झ्वलय् येँ महानगरपालिकाया मेयर विद्यासुन्दर शाक्यं ठेकेदारया कारणं यानाः येँ धू ब्वयाच्वंगु द्वपं बियादीगु दु ।

लिपांगु इलय् न्हिथं महानगरं सफा यायेगु ज्या जुयाच्वंसां नं थीथी थासय् न्ह्यानाच्वंगु विकास निर्माणया ज्यां हाकनं धू सतकय् वयेगु यानाच्वंगु दावी नं वय्कलं यानादीगु दु । महानगरयात सुन्दर नगर दयेकेत यक्वः मिहिनेत यानाच्वनागु धासें वय्कलं न्ह्याक्वः सफा याःसां नं न्हू दयेकाच्वंगु सतकं धू हाकनं लँय् वयेगु यानाच्वंगुलिं दुःख सीमालाच्वंगु खँ कनादिल ।

वय्कलं अर्बाैया प्रोजेक्टय् ज्या जुयाच्वंसां नं न्हिं प्यक्वः न्याक्वः सतक सफा याःसां नं प्यगः न्यागः गाडी सतकय् वयेवं हाकनं धू ब्वयेगु शुरु जुयाच्वंगु धासें ठेकेदारपिंत धू मब्वयेक ज्या यायेत नं वय्कलं इनाप यानादिल । ज्याझ्वलय् नेकपाया अध्यक्ष पुष्पकमल दाहाल, गृहमन्त्री रामबहादुर थापा मगर, पर्यटन मन्त्री रविन्द्र अधिकारी, सामान्य प्रशासन मन्त्री लालबाबु पण्डित, पुनर्निर्माण प्राधिकरणया प्रमुख कार्यकारी अधिकृत सुशील ज्ञवालीपिंसं ब्वति काःगु खः ।

थ्वहे झ्वलय् धरहरा पुनर्निर्माण शिलान्यास ज्याझ्वः विरोधय् याःपिं सम्पदा प्रेमीपिंत प्रहरी ज्वंगु दु । सम्पदा प्रेमी यादवलाल कायस्थ, सुरज महर्जन, मनिषकुमार श्रेष्ठ, गिता शिख्राकार सुश्मा सिख्राकारयात ज्वनाः महेन्द्र पुलिस क्लबय् तयातःगु खः ।