सापारुया झाँकीया मूल्यांकन याइगु

ख्वप – ख्वप नगरपालिकां दँय्दसं थें थुगुसी नं सापारुया झ्वलय् पिहां वइगु झाँकीया मूल्यांकन याइगु जूगु दु । नगरपालिकां दँय्दसं थें थुगुसी नं ख्वप नगर दुने न्ह्यब्वइगु थीथीकथंया ख्यालि, हुलाप्याखं, घिन्तांघिसि नापं मेमेगु सांस्कृतिक विधाया मूल्यांकन यायेत्यंगु खः ।
नगरपालिकां सापारुया झ्वलय् पिहां वइगु उकथंया झाँकीया मूल्यांकन यायेत छगू मूल्यांकन समिति नं गठन याःगु दु ।

उगु समितिं दत्तात्रय व नासमना यानाः निगू थासय् च्वनाः सापारुया झाँकीया मूल्यांकन याइगु जूगु दु । वंगु साउन १७ गते च्वंगु नगर कार्यपालिकाय मुँज्यां थुगुसी सापारुया झ्वलय् पिहां वइगु सांस्कृतिक झाँकी व विधाया मूल्यांकन यानाः सिरपाः नं बीगु क्वःछिउगु दु ।

सांस्कृतिक झाँकीयात परम्परागत व आधुनिक यानाः निगू बिस्कं बिस्कंकथं मूल्यांकन यायेगु व उकिया निंतिं मूल्यांकन याइगु पुचः नं बिस्कं निर्धारण यानातःगु दु । ख्वपय् सापारुया झ्वलय् पिहां वइगु सांस्कृतिक झाँकीइ परम्परागत विधाय् गाइँचा म्येँ, भैलः प्याखं, महाकाली प्याखं, कवंचा, खिचा, भुचा, जंगली लगायतया प्याखं दुथ्याः ।

अथे हे आधुनिक विधापाखे न्ह्यसः लिसः, झ्याउरे, ख्यालः, थीथीकथंया ख्यालि न्हिलि म्येँ व प्याखंयात कयातःगु दु । नगरपालिकां सापारुया झ्वलय् पिहां वइगु उकथंया सांस्कृतिक विधाया मूल्यांकन यानाः सिरपाः तकं बीगु याना हसांनिसें छगू इलय् लोप जुया वनीगु अवस्थाय् थ्यने धुंकूगु अज्याःगु आपालं परम्परागत व सांस्कृतिक झाँकीयात हाकनं पिथनेगु ज्या जूगु दु ।

थुकियात नगरपालिकां सांस्कृतिक झाँकीयात प्रोत्साहन बिउगुकथं नं काःगु दुसा आधुनिक व सांस्कृतिक विधाया हलंज्वलं न्यायेत तकं ग्वाहालि जू वंगु दु ।