
येँ (नेपालभाषा टाइम्स)÷ शंखमुलय् छगू नीजि छेँया पःखाः येँ महानगरपालिकां डोजर हयाः थुनाबिउगुलिं शुक्रवाः सभागृहय् येँ महानगपालिका व मेयर बालेन साहविरुद्ध प्रदर्शन जूगु दु ।
येँ महानगरपालिकाया नगर परिषद् जुइत्यंगु इलय् सभागृहया मूलुखाय् थ्व प्रदर्शन जूगु खः । पीडित परिवारया आह्वानय् जूगु शान्तिपूर्ण प्रदर्शनय् स्वनिगःया थीथी थासं मनूत सहभागी जूगु खः । प्रदर्शनयात नेवाः देय् दबुलिं नं समर्थन याःगु खः । वंगु पुस २८ गते ये महानगरपालिकां ३१ वडाय् लाःगु शंखमुलय् नीजि सम्पत्तिइ डोजर हयाः पःखाः थुनाबिउगु खः ।
प्रदर्शन सहभागी पीडित साहेल सिंह महर्जनं येँ महानगरपालिकां छुं हे जानकारी तकं मबिउसे थःपिनिगु सम्पत्तिइ आक्रमण याःवःगु धासें थःपिंत जूगु अन्यायविरुद्ध थःपिं सतकय् कुहां वयेमाःगु खँ धयादीगु दु । पत्रकारतय्त प्रतिक्रिया बीगु झ्वलय् वय्कलं सुयागुं नं नीजि सम्पत्ति अधिग्रहण हे यायेगु खःसां ३५ न्हुया सुचं बीमाः, तर थःपिंत छुं हे सुचं तकं मबिसें आकाझाकां थःपिनि नीजि सम्पत्तिइ डोजर हयाः आक्रमण याःवःगु खँ धयादीगु दु ।
येँ महानगरपालिकां गथे थःपिनिगु सम्पत्तिइ आक्रमण याःवःगु खः, अथेहे लिपा मेपिनिगु सम्पत्तिइ नं आक्रमण याये वयेफुगुलिं थःपिंत जूगु अन्यायविरुद्ध सकसितं साथ बीत आह्वान नं वय्कलं यानादीगु दु । महानगरपालिकां न्यंकाच्वंगु थ्व आतंकयाविरुद्ध थौं जुइगु नगर परिषद्या बैठकय् थीथी वडाया अध्यक्षपिंसं नं न्ववाइगु खँ धाःगु दु ।
महानगरपालकाया आतंक विरुद्ध वइगु माघ १५ गते फिब्व ख्यलय् वृहत् प्रदर्शन नं यायेगु नं तयार जुयाच्वंगु दु ।
LEAVE YOUR COMMENTS