८ करोड भारु भ्वं जुइन !

भारतीय रिजर्भ बैंकं नेपाःयाके दुगु भारु हिला बीगु नां हे मकाः

येँ – नेपाःया थीथी बैंकय् लानाच्वंगु करिब ८ करोड तका बराबरया भारु आः भ्वंया कुचा हे जक जुइगु अवस्थाय् थ्यंगु दु । भारतं थनिं निदँ न्ह्यः याःगु नोटबन्दीया इलय् हिला मबिउगु न्यासः व द्वःछि तकाया थ्व भारु आः तक नं भारतं हिलेगु नां हे मकाःगु कारणं भ्वंया कुचा जुइगु अवस्थाय् थ्यंगु खः ।

छुं ई न्ह्यः तिनि भारतया केन्द्रीय रिजर्भ बैंकं नोटबन्दीया थ्व योजना समापन जूगु व उकी भारतं आशा यानातःगु फुक्क हे दां दुहां वयेधुंकल धकाः प्रतिवेदन पित बिउगु खःसा उकी नेपालय् थानाच्वंगु नोटया बारे छुं उल्लेख याना तःगु मदु । नेपाल राष्ट्र बैंकं थुकिया बारे भारतया रिजर्भ बैंकलिसे तःक्वः खँ ल्हायेधुंकूसां सफल धाःसा मजू ।

उकिं आः राष्ट्र बैंंकं थ्व मुद्दा थःपिनिगु ल्हातय् मदयेधुंकल धासें निगू देय्या सरकार दथुइ हे खँल्हाबल्हा यानाः छुं उपाय पिकाःसा बाहेक मेगु कथं लिच्वः पिहां वइगु सम्भावना मदु धाःगु दु । दछि न्ह्यः भारतीय प्रधानमन्त्री नरेन्द्र मोदी मुक्तिनाथ भ्रमणय् वःबलय् प्रधानमन्त्री केपी ओलीं थुकिया बारे खँ ल्ह्वनादीगु खःसां उकिया बारे नं आः तक छुं कारवाही धाःसा मजूनि ।

थ्व न्यासः व द्वःछि वंगु भारतीय मुद्रा नेपाःया राष्ट्र बैंकय् करिब ८ करोड तका बराबरया दुसा सर्वसाधारण मनूतय्के नं करोडौं तकाया दनि । यदि भारतं थ्व दां हिला मबिल धाःसा फुक्क हे नोट भ्वंया कुचा जक जूवनी । भारतं भूटानयाके दुगु भारु धाःसा हिला बिउगु खःसां नेपाःयाके दुगु भारु हिला मबिउगुलिं राष्ट्र बैंक अजूचायाच्वंगु दु ।

थुकियात भारतया दादागिरि हे खः धकाः तकं अर्थविद्तय्सं धया हःगु दु । थ्व स्वयां न्ह्यः भारतं छक्वः नेपालय् लानाच्वंगु १८ करोड तकाया भारु हिला बिउगु खःसा वयां लिपा भारतया अनुमति कयाः जक नेपालं न्यासः व द्वःछि वंगु भारु कायेगु याना हःगु खः ।

आः भारुया कारोवार याये मजिउ

यदि भारतं नेपाःयाके दुगु भारु हिला मबिल धाःसा उकिया विरुद्ध संसारया छुं नं थासय् उजुरी नं तये मफइगु खँ विज्ञतय्सं धाःगु दु । उकिं आः नेपाःमितय्सं भारु कायेबलय् सतर्क जुइगु व फयांफछि भारुया कारोवार हे मयायेगु बाहेक मेगु उपाय मदुगु खँ नं धयाहःगु दु ।

निदँ न्ह्यः जूगु नोटबन्दी लिपा न्यासः व द्वःछि वंगु नोट काःसां जिउ धकाः नेपाःयात अनुमति मबिउनिगु कारणं नेपाःमितय्सं आः थ्व भारु काये मजिउगु खँ राष्ट्र बैंक सूत्रं धाःगु दु । सूत्रया कथं यदि नोट काल धाःसा उकिया सम्पूर्ण जोखिम नोट काःम्हेस्यां हे व्यहोरे याये माली ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु