कपिलवस्तु नं विश्वसम्पदाय् यंकीगु
येँ (नेपालभाषा टाइम्स)- पुरातत्व विभागं कपिलवस्तुया तिलौराकोट क्षेत्रयात विश्वसम्पदा धलखय् सुचिकृत यायेगु प्रक्रियाया नितिं मस्यौदा तयार यानाः प्रस्ताव न्ह्यःने यंकूगु दु । ऐतिहासिक, सांस्कृतिक, पुरातात्विक व धार्मिक दृष्टिं महत्वपूर्ण तिलौराकोट क्षेत्रया उत्खनन् लिपा अन लूगु सामग्रीया आधारय् विश्व सम्पदा धलखय् सुचिकृत यायेगु प्रक्रिया कथं लूगु प्रमाण सहित दस्तावेजया मस्यौदा संयुक्त राष्ट्र संघीय शैक्षिक, वैज्ञानिक व सास्कृतिक संगठन (युनेस्को) य् पेश यानागु खँ विभागया प्रवक्ता रामबहादुर कुँवरं कनादीगु दु ।
वंगु वालय् न्ह्यब्वःगु दस्तावेजया मस्यौदा अध्ययन यानाः युनेस्कों भिंकाः छ्वया हयेत सुझाव बी फइगु खँ वय्कलं कनादीगु दु । युनेस्कोया सुझावया आधारय् लिपांगु दस्तावेज आः वइगु माघय् पेश यायेगु कथं विभागं तयारी यानाच्वंगु दु ।
थ्व स्वयां न्ह्यः नेपाःया निगू प्राकृतिक व च्यागू सांस्कृतिक यानाः झिगू सम्पदा विश्व सम्पदा धलखय् सूचीकृत जुइधुंकूगु दु । सांस्कृतिक सम्पदाय् स्वनिगः व लुम्बिनी विश्व सम्पदाय् लायेधुंकूगु दु । येँ, यल व ख्वप स्वंगुलिं सांस्कृतिक सम्पदा युनेस्को विश्वसम्पदा धलखय् सूचीकृत यायेधुंकूगु खँ प्रवक्ता कुँवर कनादिल ।
उकथं प्राकृतिक सम्पदाय् सगरमाथा क्षेत्र व चितवन राष्ट्रिय निकुञ्ज विश्वसम्पदा धलखय् सूचीकृत जुइधुंकूगु दु । तिलौराकोट क्षेत्र विश्वसम्पदा सूचीइ सूचीकृत जुल धाःसा सांस्कृतिकपाखे मेगु छगू न्हूगु सम्पदा सूचीकृत जुइगु खँ नं विभागं धाःगु दु ।
LEAVE YOUR COMMENTS