ज्यापु समाजया वृद्धाश्रम उलेज्या
यल- प्रधानमन्त्री शेरबहादुर देउवाः ज्यापु समाजया ज्येष्ठ नागरिक भवनया उलेज्या यानादीगु दु । प्रम देउवां यल महानगरपालिका वडा नं. ४ बागडोलय् च्वंगु ज्येष्ठ नागरिक आनन्द निकेतन भवनया उलेज्या यानादीगु खः ।
भवन उलेज्या लिपा प्रम देउवां सुं नं ज्याथजिथिपिं वृद्धाश्रमय् च्वनेगु परिस्थिति मवयेमा धासें यदि अज्याःगु अवस्था व हे वल धाःसां नं ज्येष्ठ नागरिकया निंतिं उचित सुविधासहितया व्यवस्था यायेत सरकारं फक्व ग्वाहालि यायेगु जुइ धयादिल ।
स्वंगुलिं तहया सरकार, स्थानीयवासी व भारत सरकारया ग्वाहालिं निर्माण जूगु सुविधा सम्पन्न भवनया संचालनया निंतिं सरकारं नं ग्वाहालि यायेगु प्रतिवद्धता नं वय्कलं प्वंकादिल ।
गृहमन्त्री बालकृष्ण खाणं ज्येष्ठ नागरिकया सुरक्षाया निंतिं भवन निर्माणं देय्या आपालं मनूतय्त उर्जा प्राप्त जूगु दु धासें थुकथंया भवनय् छेँजःपिं मदयेकाः च्वनेमाःपिं ज्याथजिथिपिंत सुसाःकुसाः व सम्मान यायेगु ज्या याये फयेमा धयादिल ।
बागमति प्रदेशया मुख्यमन्त्री अष्टलक्ष्मी शाक्यं जीवित इतिहासया धरोहरया रुपय् दयाच्वंपिं ज्येष्ठ नागरिकया निंतिं थुकथंया भवनपाखें बांलाःगु सुविधा प्राप्त जुइगु विश्वास प्वंकादिल ।
ज्याझ्वलय् नेपाःया निंतिं भारतीय राजदूत विनयमोहन क्वात्रा, यल महानगरपालिकाया प्रमुख चिरिबाबु महर्जन, समाजया नायः चन्द्र महर्जन, उपाध्यक्ष सन्तमान महर्जनं नं नुगःखँ प्वंकादीगु खः ।
स्थानीयवासी मदुम्ह अष्टमान महर्जनं दान बियादीगु १ रोपनी १३ आना जग्गा निर्माण जूगु भवन ८ दशमलव ५ रेक्टर स्केल तकया भुखाचं छुं मजुइकथं निर्माण याःगु खः । उगु इलय् जग्गा दाता महर्जनया झ्वाता नं अनावरण याःगु खःसा दाताया महर्जनया जहान न्हुछेमाया, काय किरण महर्जनयात दोसल्लां न्ययेकाः हनेज्या नं याःगु खः ।
LEAVE YOUR COMMENTS