लुँया भावय् न्हूगु कीर्तिमान, व्यवसाय डाँवाडोल

येँ – अमेरिका व चीन दथुया वार्ता असफल जुइवं अन्तर्राष्ट्रिय बजारय् लुँया भाः थहां वंगु दु । वंगु बुधवाःनिसें शुक्रवाः तक अमेरिकी व चिनियाँ सरकार दथुइ जूगु वार्ता असफल जुइवं अमेरिकां चीनपाखें आयात याइगु ३ अर्ब डलरया सामानय् १० प्रतिशत कर लगे यायेवं अन्तर्राष्ट्रिय बजारय् लुँया भाः थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं ‘नेपालभाषा टाइम्स’ यात कनादिल ।

म्हिगः नेपाःया बजारय् छापावाला लुँ प्रतितोला ६६,३०० तका थ्यंगु खः । थ्व भाः आः तकया न्हूगु रेकर्ड जूगु खँ नं वय्कलं कनादिल । थ्व स्वयां न्ह्यः वंगु शुक्रवाः जक लुँ प्रतितोलां ६५,८०० तका थ्यनाः न्हूगु रेकर्ड जूगु खःसा म्हिगः थ्व रेकर्ड नं त्वाःदःगु दु ।

अमेरिका व चीन दथुया विवाद समाधान मजूगुलिं विश्वया शेयर बजारय् जुयाच्वंगु लगानी लुँपाखे आकर्षित जुयाः लुँया भाः थहां वंगु विश्लेषण भाजु शाक्यं यानादीगु दु । शाक्यं कनादी कथं फेडरल बैंक अफ अमेरिकां न्हापा निक्षेपय् २.२५ प्रतिशत ब्याज बियाच्वंगु खःसा आः उकी शून्य दशमलव २५ प्रतिशतं क्वपालेवं उकिया लिच्वः नं लुँया अन्तर्राष्ट्रिय बजारय् लाःवःगु खः ।

वंगु शुक्रवाः जक अन्तर्राष्ट्रिय बजारय् लुँया भाः प्रतिऔंश १४३२ डलर कायम जूगु खःसा शुक्रवाः चान्हय् तक ९ डलरं थहां वनाः १४४१ थ्यंगु खः । नेपालय् लुँया भाः थहां वनीगुली धाःसा भारतीय कारण नं दइगु विश्लेषण शाक्यं यानादी । वय्कःया कथं डलरया भाः थहां वनेवं भारतीय ध्यबा अवमूल्यन जुयाः नं उकिया लिच्वः कथं नेपालय् लुँया भाः थहां वनेत तिबः जूगु खः ।

लुँवहः व्यवसाययात लिच्वः ः
लुँया भाः तसकं थहां वंगुलिं नेपाःया लुँवहः व्यवसायय् धाःसा नकारात्मक लिच्वः लाःगु दु । बजारय् लुँ न्याइपिं स्वयां नं मीपिं आपालं वयाच्वंगुलिं लुँवहः व्यवसायीतय्त समस्या जुयाच्वंगु खँ तिसा ज्वलंया भाजु निरञ्जनरत्न शाक्यं ‘नेपालभाषा टाइम्स’ यात कनादिल ।
वय्कःया कथं लुँया भाः थहां वनाः चीधंपिं लुँया व्यापारीतय्त अप्वः समस्या जुयाच्वंगु दु ।

वय्कलं धयादी, ‘छु याये, पुलांपिं ग्राहकत लुँ मी माल धकाः वइ, मकाये उकिया लिच्वः लिपा वनाः थःगु हे व्यापारय् लाइ । अथे जुयाः चलनचल्ती भाः स्वयां छुं भचा म्हो यानाः लुँ न्यायेमाःगु बाध्यता दु ।’ भाः थहां वंगुलिं लुँया तिसा दयेकीपिं नं म्हो जुयाच्वंगु खँ वय्कलं कनादी ।

सम्बन्धित बुखँ

LEAVE YOUR COMMENTS